Intlân chhâwk hi damna famkim a ni lo - Home Minister Chama

Coordination Committee on Traffic Management chairman Lalchamliana, Home minister chuan, Aizawla lirthei intlân chhâwk chu traffic jam tihreh vekna tur (permanent solution) a ni lo tih sawiin, "Traffic jam tihreh vekna atana damna famkim a ni lo a, tunah rih chuan kan thil tih theih, mi tin tana ṭangkai leh ṭha niin a lang," a ti.

July 16, Thawhlehnia Coordination Committee on Traffic Management (CCTM) meeting, Secretariat Conference Hall-a neihah Aizawla traffic jam tihrehna tura Mizoram Bar Association (MBA) lehkha thehluh chungchang leh rawtna dangte an sawiho a ni. Lalchamliana chuan, traffic jam tihrehna tura MBA rawtnate chu a theih anga sorkarin a bawhzui tur thu a sawi.

Aizawl mayor PC Lalhmingthanga'n Aizawl Municipal Corporation-in traffic jam tihziaawmna tura hma an lak dan te, local council-te nena ṭanghoa hmalak an tum dan te, traffic jam tihziaawm nan tun hnaiah taxi stand leh stand dangte metre 2,252.8 an paih ṭhen thute a sawi a; Mizoram sorkar hmalakna, intlân chhâwk dan thar ruahmanna chu ṭha a tih thu a sawi bawk.

Meeting-ah hian, Aizawl khaw­puia traffic jam tihziaawmna kawngah traffic police, AMC, Transport, UDPA leh department dangte'n thawhhona ṭha an neih zel a pawimawh thu te, lirthei dahna tur parking hmunhma siam belh dan kawng dap a ṭul thu te, kawng leh kawng sir hman dan felfai zawka ruahman a pawimawh thute an sawi a ni.

Meeting chuan, tuna intlân chhâwk dan chu thla khat tal en a nih hnuah, thla khat a ral hmain ruahmanna thlir lêt ṭha a ti a; kawngpui leh kawng sir hman dan ruahman zir chiang a, inkaihhruaina duan ni se, an ti. Lirthei tihtlem dan ‘vehicle population control rules’ duan chhin ni se, tiin an rel a; working group leh Aizawl DC hnuaia Road Enroachment Committee-te hmalak tum dan tarlan a ni bawk.