Dan thar duan pawl pathumin Mizote tan a him loah an ngai
Zo Indigenous Forum (ZIF), ZoRO leh PRISM-te chuan nimin khan Aizawl Press Club-ah thuthar thehdarhtute an kâwm a; sorkar laipuiin a buatsaih mek India Forest (Amendment) Bill, 2019 chu Mizote tan him loa an hriat thu an puang.
ZIF dintu C Lalremruata chuan, British hun laia forest dan siam tawh, The Indian Forest Act, 1927 chu kum 90 hnuah siamṭhat ngai tam tak a awm avangin sorkar laipuiin India Forest (Amendment) Bill, 2019 a buatsaih thu a sawi a, "Dan duan tharah hian Indian Constitution hnuaia inhung bikna kan neih Article 371(G)(a - ii, iii leh iv) chu nasa takin a palzût dawn a, Mizote tan dan hlauhawm leh ṭha lo tak a ni dawn. He dan duan mek do tur hian Mizoram sorkar, political party leh tlawmngai pawl zawng zawng kan ngen a ni," a ti.
Dan duan thar chuan forest officer-te forest encroachment chungchangah an duh duh kah theihna a pek thu sawiin C Lalremruata chuan, "Arrest of warrant tel loa mi in chhung luh theihna leh dap theihna pawh an nei. Armed Forces Special Power Act, 1958 ang maiin forest officer-te'n an duh duh an kâpin an dap thei dawn tihna a ni," a ti a, forest dweller-te dikna leh chanvo pawh forest conservation thil nen a inkalh a nih chuan laksak theih an nih dawn thu a sawi.
Pawl pathumte tarlan danin, he dan thar ruahman hian Indigenous Peoples Rights leh UNDRIP bung hrang hrangte a bawhchhe nasa hle a ni. Section 3.2.2 ah chuan 'Central sorkarin forest-te hman an duhdan anga state sorkarin hma a la lo a nih chuan over-rule theih an ni ang' tih a ni a, hei hi India constitution-a federal structure spirit nen pawh a inkalh tlat a ni.