Social media leh computer games-ah hun khawhral tam lo turin zirlaite fuih

Higher & Technical Education minister Dr R Lalthangliana chuan, hun âwl an neih ang angte ṭangkai taka hmang ṭhin tur leh social media leh computer games-ahte hun khawhral tam lo turin a chah.

HTE minister Dr R Lalthangliana hian nimin khan Aizawl West College-in Vanapa Hall-a Fresher’s Social 2019 an hman chu hmanpuiin, fuihna thu a sawi a; zirlaite zingah chawr­chhuahna inan loh vanga zirnaa hnufual bik tura inngai lo tura fuihin, hunbi vawng ṭha tur te, hun âwlte a ṭangkai thei ang bera hmang tur te, social media leh computer games-ahte hun khawhral tam lo turtein a chah a ni.

Dr R Lalthangliana chuan, Mizo ram leh hnam hmasawnna leh dinchhuah zelna kawng­ah zirlaite'n mawhphurna pawimawh tak an neih thu sawiin, "Harsatna leh kan hmaa mawhphurna awm­te hi huphurha kalsan tum mai loin, ka ti thei ve a ni tih rilru pu a, beidawng loa hma­chhawn zel hi hlawh­tlinna thlentu a ni," a ti.

Aizawl West College hi kum 1990-a din a ni a; B.A zirna department pariat - History, Political Science, Public Administration, Economics, Education, Psychology, English leh Mizo-te awmin, zirlai 806, teaching faculty 35 leh non-teaching staff 15 an awm mek a ni.