KHAWTHLIR

Aizawl leh Lengpui Airport inkara thlawhtheihna passenger phur tura lirthei thlan bik (empanelment of vehicle) Mizoram sorkarin a siam chu February 22, Thawhṭanni aṭangin tihtawp a nih thu, nimina sorkar thuchhuah chuan a tarlang. 

MFM School of Nursing chuan nimin khan Bawngkawn South community hall-ah health worker zir thar mi 20-te pualin Capping and Lamp Lighting Ceremony vawi 12-na an hmang a, Health secretary H Lalengmawia'n a hmanpui. MFM School of Nursing-ah hian mi 239-in health worker an zir chhuak tawh a ni.

Mamit bawrhsap Dr Lalrozama kaihhruaiin nimin khan DC conference hall-ah sorkar official-te leh pawl hrang hrang hruaitute chuan kumina Chapchar Kut (March 5) hman chungchang an ngaihtuah a; Chapchar Kût chu Covid-19 léng vangin district huapa a huhoa hman loh an rél.

Information & Public Relations (IPR) auditorium-ah nimin khan IPR secretary Sangdingliana thlahna hun hman a ni a, IPR minister Lalruatkima'n a hmanpui. Sangdingliana hi February 26, 2021-ah sorkar hna aṭangin pension-in a chhuak dawn a ni.

State Referral Hospital-ah nimin khan Covid-19 vei mi pakhat dah luh a ni a, ani nen mi pariat enkawl mek an ni. SRH-ZMC Bulletin tarlan danin, mi pariat zinga pakhat chu ICU-ah ventilator nen enkawl zui zel a ni a, mi dang zawng Isolation ward-ah awmin, harsatna lian tham nei an awm lo.

Kolasib SP chuan Bairabi khaw chhung, NH-154 kawngpuia lirthei tlân dan turah thuchhuah a siam a; March 1, 2021 aṭang chuan Bairabi khaw chhungah lirthei lian, bungraw phur ni lote chu Bairabi by-pass road (NH-154 - FCI Godown) kawngah tlân vek tur a nih thu a tarlang. Harsatna nei leh sawi tur nei tan Bairabi Police Station O/C phone no. 8794723770 / 8974687205 ah biak theih a ni.

Commerce & Indus­tries minister Dr R Lalthangliana chuan, Mizoram chhunga tuialhthei zawngtute aṭangin Mizoram sorkarin hlâwkna cheng vbc. 32.89 a hmuh tawh thu Assembly House a hrilh.

ZPM member VL Zaithanzama zawhna chhángin Dr R Lal­thangliana chuan, "Mizo­ramah oil zawn hna thawk company pahnih an awm mek a, chungte chu - Oil & Natural Gas Corporation Ltd. leh Oil India Ltd. a ni. Gas hmuh chhuah a tam tawk loh avangin tun thlengin lâk chhuah loh a ni," a ti.

Lungleia Assam Rifles-te chuan February 23, Thawhlehni khan National Deworming Day pualin Lungleia Assam Rifles Public School leh Sethlun Anganwadi Centre-ah hun an hmang a, naupang 130 hnenah rûlhût hlo (Albendazole) an pe. February 22 khan Siaha Higher Secondary School leh ECM Higher Secondary School-ah Weapon Display hun hmangin, ralthuam hrang hrang zirlaite entirin an hrilhfiah.

GAD changtu chief minister Zoramthanga chuan INC member Zodintluanga Ralte zawhna ziaka chhángin, district thar pathum - Saitual, Khawzawl leh Hnahthialah DRDA project director dah tum a nih thu a tarlang a, "Sorkar kum thar hun remchang hmasa berah dah tum a ni," a ti.