Covid-19 avangin kan sum hmuh A tlahniam nasa - Chief Minister
Nimin khan Assembly session-ah Governor thusawi sawiho a ni. Chief minister Zoramthanga chuan, Covid-19 avangin sorkar laipui aṭanga Mizoram sum hmuh a tlakhniam nasat thu a sawi.
Chief Minister chuan, Covid-19 avangin union territory leh state zawng zawngin central aṭanga an sum hmuh tur ang an hmu pha lo tih sawiin, "Kan hmuh tur ang kan hmuh loh ringawt hi cheng vbc. sang chuang a ni. Hlawh kan inpe thei hi a lawmawm. A tirah chuan SEDP-ah pawh vbc. 500 chuang dah a ni a, a tak taka state leh central-ah lo lut a awm loh avangin kan kalpui tak tak thei lo. Covid-19 kum hi a buaithlak a ni," a ti.
Ramrì-ah Assam-in anmahni aṭanga indangte nen buaina an neih vek thu sawiin Zoramthanga chuan, "Assam hi Meghalaya, Nagaland leh Arunachal Pradesh nen pawh an buai em em vek. A buai zualna chu Assam an inthlang dawn si a, ramria awm tam ber Bangladesh aṭanga lo kal an ni a, an rawn tibuai leh ṭhin. Hloh aiin hlâwk lamin kan kal," a ti a, ramria police leh mipui chêt dan fakawm a tih thu a sawi.
House Leader chuan, zu zawrh an khap chu an tihfuh ber pakhat a nih thu sawiin, "Zu zawrh lai chuan ṭhalai an thi zawih zawih a, zuar lo turin sorkar an nawr hneh si lo. Kan han sorkar a, khap pawh a har, Court-ahte an zualko a ni. A tawpah chuan kan khap thei. Khap zel pawh a ṭha kan ti," a ti.
ZPM Legislature Party leader Vanlalhlana chuan, hun rei tak session loh hnuah party hrang hrang MLA-te kim taka an kal thu sawiin, "Keini chu kan kim ve ta lo, arpui no hruai, a pui múin a laksak ka inchan. Kum 1986-ah independent-in mi 24 MLA-ah an tling a, Pu Laldenga hoin MNF-in sorkarna an siam a ni," a ti a, independent MLA 24-te chu héktu an awm ve loh thu a sawi.
Vanlalhlana chuan, Mizo mipuiin SEDP an hriatthiam dan chuan, sorkarin budget-ah cheng nuai 1,500 vel dahin, chhungkaw tin hnenah nuai thum sem a nih thu sawiin, "NLUP dawng tawh zawng zawng pawhin cheng nuai thum an dawng dawn tih hi kan hriat dan a ni a, mipui beisei dan pawh a ni. Vawiin thlengin pek an la ni lo," a ti a, MNF-in SEDP chu an tlâkpui a rin tlat thu a sawi.
Congress Legislature Party leader Zodintluanga Ralte chuan, Governor thusawi chu Congress sorkar liam tain a lo tih tawhte sawi mawina a nih thu sawiin, "Hmasawnna han en ila, NEC leh NLCPR-ah sanction a awm a, Governor-in a amount a sawi ngam lo. Sports Minister awm lo se chuan sorkar achievement sawi tur a awm lo, Sports Minister chungah lawmthu sawi mawlh mawlh tur a ni," a ti.
Zodintluanga Ralte chuan, mau chungchang Governor-in a sawi chhuak lo tih sawiin, "Budget session-a sawi tur àwma ka ngaih Brandisii leh Latiflorous sawi a ni lo. House Leader-in kan ram tan a ṭhatzia tui takin House a hrilh a, Larsap thusawiah telh a ni leh si lo hian mimal taka CM sumdawnna emaw ni le tih mipui ngaihdanah a awm ang tih a hlauhawm," a ti a; cheng nuai thum sem pawh sawi chhuah a nih loh thu a sawi.
PAHOSS chu mi hausate in lian tak tak sakna a nih thu sawiin Zodintluanga chuan, "Traffic jam awm miah lohnaahte cheng nuai tél pek a ni, traffic jam a tireh ang em? PAHOSS atana sum hman tawh hi mi 2,333 hnenah cheng nuai thum ṭheuhin a sem theih," a ti.
MNF member C Lalmuanpuia put luh, Governor thusawia lawmthu sawina Motion of Thanks chu member-te'n an sawiho hnuah pawm a ni.