Tlawng hmang turte fimkhur turin chah

Tlawng lui kama awm Bairabi leh Sairanga khaw­tlang hruaitute chuan an khuaa Tlawng luia kal turte hriat tur thuchah an tichhuak a, an thuchahte chu zâwm vek tur leh luiah fimkhur turin Tlawng luia kal turte an chah.

Sairang Branch YMA chuan thuchhuah siamin, hmun dang aṭanga Sai­rang kài Tlawng luia intihlim tura kal turte chu lui tui chhungah balu lâkna khuar a tam avangin fimkhur turin an chah. Sairang Branch YMA Vigilance Sub-Committee member-te an duty ṭhin thu tarlangin, "Ruihhlo nen Tlawng luia intihlim tura rawn kal hi phal loh a ni a, ruihhlo tel loa rawn intihlim turin kan inngen a ni," an ti. 

Bairabi North VC chuan, an huam chhunga awm, Tlawng lui kama Bairabi Beach an tih mai chu hmangtu an tam sâwt hle tih sawiin, "Tlawng lui ah hian pump hmanga ṭiau (balu) lâkna khuar thûk bik, tlâk hlum theihna a awm nual a, fimkhur theih ni se," an ti a; thil eina nâwi leh bawlhhlawhte hnutchhiah loa thian fai nghal zel turin an chah.

Bairabi Beach hmang­tute chu hlim leh nuam ti taka hun hmang tura an duh thu an sawi rualin, rûi chunga zan rei tak tak thlenga bengchheng siam an awm ṭhin avangin, zan dar 7 thleng bâk awm phal a nih tawh loh thu an tarlang a, lui hmangtute chu mawi lo taka khawsa lo turin an chah a ni.