House-ah mi pahnih sûn a ni

Nimina Assembly session-ah tun ṭum session leh session hnuhnung ber inkara thi MLA pahnih - RD Sangkhuma leh K Thangzuala te sûnna hun hman a ni.

House leader Zoram­thanga chuan, MLA hlui pahnihte chanchin leh uina thu a sawi a; chumi hnuah ZPM Legislature Party leader Vanlalhlana leh Congress Legislature Party leader Zodintluanga ten uina thu an sawi leh bawk. Thu an sawi zawhah speaker Lalrinliana Sailo kaihhruainain MLA hlui pahnihte sûn nan member-te chu ngáwi rengin minute khat chhung an ding. 

March 22, 1945-a piang RD Sangkhuma chu kum 1972 khan Mizo Union ticket-in Ratu bialah MLA atana thlan a ni. Kum 2014-ah a kâwng hnung lam nuam lo a sawi ṭan a, a natna chuan a kal a tichhia a, October 15, 2020 khan Aizawl Civil Hospital-ah a thi a ni.

K Thangzuala chu Feb­ruary 1, 1933-ah a piang a, engineer niin, PWD secretary a nih laiin sorkar hna aṭangin pension-in a chhuak. MNF party zawm­in, kum 1998 inthlan­puiah Serchhip bial aṭangin MLA atana thlan a ni a; MLA a nih chhung­in minister of state leh Planning Board vice chairman a ni. Novem­ber 15, 2020 khan pneu­monia leh natna dangte avangin a thi a ni.