COVID-19: Mizoram dinhmun Hripui vei mi 3 hmuh belh a ni

February 23, Thawh­lehni khan Mizoramah Covid-19 vei mi pathum hmuh chhuah a ni a; nimin khan hripui laka fihlim tawh mi pakhat chu SRH-ZMC aṭangin chhuahtir a ni.

Covid-19 vei Thawh­lehnia hmuh tharte chu RAT hmanga Aizawl leh Lungleia hmuh chhuah an ni a, an vaiin tualchhunga kái vek an nih bakah, an kàina hriat a ni lo a, natna (symptom) lang chhuak lo vek an ni. ZMC laboratory leh TrueNAT-PCR hmanga swab sample endik zingah positive an awm lo.

Mizoramah Covid-19 vei mi 4,413 hmuh chhuah a ni tawh a, mipa 3,224 leh hmeichhia 1,187 an ni. Nimin tlai dar 5 thleng khan mi 4,380 (99.25%) chhuahtir an ni tawh a, mi 10 (0.23%) thi tawhin, enkawl mek mi 23 (0.52%) an awm. 

Thawhlehni khan ZMC laboratory-ah swab sample 66, TrueNAT-PCR hmangin district paliah sample pakua leh RAT hmangin district 11-ah sample 861 endik a ni a; sample endik zawng zawng chu 936 niin, chu'ng aṭanga Covid-19 positive hmuh chhuah pathum chu 0.32% a ni.

February 23, 2021 thlenga Mizorama swab sample endik tawh zat chu 2,28,634 a ni a, chu'ng aṭanga Covid-19 positive mi 4,413 chu 1.93% a ni. Hripui vei hmuh tawh zinga mi 2,101 chu Mizoram chhunga kái chhâwng an ni a, mi 2,312 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district paruk - Siaha, Kolasib, Serchhip, Mamit, Khawzawl leh Hnahthial district-ahte Covid-19 vei an awm tawh rih lo.

Vairengte - 1: Mipa kum 38, dam loh vanga inentir tura Aizawla private hospital-a a kalnaa hmuh chhuah, hri kàina hriat loh, symptom a nei lo.

Pángzáwl - 1: Hmeichhia kum 62, dam loh vanga inentir tura Aizawla private hospital-a a kalnaa hmuh chhuah, hri kàina hriat loh, symptom a nei lo.

Bualpui NG - 1: Mipa kum 16, zirlai, hostel luh dawn vanga swab test, hri kàina hriat loh, symptom a nei lo.