Zan dar 10-ah curfew ṭan a ni March 1-ah M/S hawn ṭan tur

Disaster Management & Rehabilitation (DMR) depart­ment chuan nimin khan thupek tichhuakin, Covid-19 lêng vanga inkaihhruaina ṭhenkhat tih­danglamte a tarlang a, hman ṭan nghal a ni. Zan lama curfew ṭan hun chu dar 10-ah sawn hlat a ni a, March 1, 2021 aṭangin middle school zirlaite sikul kài phal a ni.

DMR department chuan, Mizoram sorkarin January 16, 2021-a order a lo chhuah tawh chu tihdanglam a nih thu a tarlang a; district headquarters-ah zan dar 10 aṭanga a tuk zing dar 4 inkarah páwna chhuah khap tlat a nih thu tarlangin, "Hemi atan hian district magistrate-te'n CrPC Section 144 tlawhchhanin thupek an chhuah ang," a ti. 

Order-a tarlan danin, March 1, 2021 aṭangin middle school-a pawl 5-8 zirlaite chu sikul kaitir ṭan theih a ni a, hostel-a awmte tan pawh luh theih a ni. Sikul kái turte chu body temperature enfiah zel tur a ni a, hostel-a lut turte tan swab sample endikna result, hostel luh hma darkar 96 aia rei loa lak negative certificate neih a ngai thung.

District khawpuiah dawr, hotel, restaurant leh sumdawnna hmun dangte chu zan curfew ṭan hun bawh buai lo tâwka hawn phal a ni a; hotel leh restaurant-te tana inkaihhruaina hman tur chu Tourism department duan tura dah a ni. Damdawi dawr leh petrol pump-te chu hawn hun bituk a awm tawh lo.

Zan lama curfew-in a huam loh khaw dang zawngah chuan dawr, hotel, restaurant leh sumdawnna hmunte hawn chungchangah in­khuah­khirhna a awm tawh lo.