Covid-19 dan hnuaiah mi 75,945-in Cheng nuai 152.50 an cháwi tawh

Mizoram police leh hmun hrang hranga local/village task force-te chuan May 4, 2020 aṭanga nimin zing dar 9 thleng khan The Mizoram (Containment and Prevention of Covid-19) Ordinance/Act, 2020 bawhchhia mi 75,945 an man tawh a, chu'ng mite pawisa chawi tling khawm chu Rs. 1,52,50,600 a ni.

February 23, Thawhlehni zing dar 9 leh nimin zing dar 9 inkar bikah Covid-19 dan bawhchhia mi 111 man an ni a; police man mi 107 leh flying squad man mi pali an ni. Mi 111 mante chu vantlang hmuna hmai tuam lo mi 50, physical distancing zâwm ṭha lo mi 25, vantlang hmuna chil chhâk mi 22 leh sorkar dan siam dang zâwm lo mi 14 an ni. Mi 111-te pawisa chawi tling khawm chu Rs. 30,600 a tling.

Police department-in nimina thuchhuah an siamah, The Mizoram (Containment and Prevention of Covid-19) Ordinance/Act, 2020 bawhchhia man leh hrem (pawisa chawitir) an tarlanah, Chapter-II Section 4(4) (organising any social or religious event without prior permission from the competent authority) bawhchhia man leh hrem (pawisa chawitir) tarlan a awm lo zui zel. Chutih laiin, Sakawrdai leh Vaitin khuaa EFCI kohhrante chu December 25, 2020 (Krismas ni)-ah an inkhawm avangin Rs. 5,000 ve ve chawitir tawh an ni.

Aizawl    43,137    Rs. 96,68,400

Lunglei    4,945    Rs. 10,94,600

Siaha    1,372    Rs. 1,91,600

Champhai    2,830    Rs. 4,38,700

Kolasib    2,404    Rs. 2,55,200

Serchhip    4,775    Rs. 10,94,600

Lawngtlai    6,106    Rs. 8,76,200

Mamit    2,071    Rs. 2,43,900

Saitual    1,216    Rs. 2,40,300

Khawzawl    3,673    Rs. 5,51,300

Hnahthial    2,202    Rs. 2,32,300