Retailer-te zawm tur hriattirna tichhuak

Sorkar thuchhuah chuan Lunglei district-a fair price shop retailer zawng zawng zawm tur a tarlang a; retailer-te chu zawm vek turin a hriattir. Mipuiin buhfai an lak kim hma chuan retailer-te'n Pathianni tiam loin, ni tin zing dar 6:30 - 8:30 leh tlai dar 3:30 - 5:30 chhung an inhawng tur a nih thu tarlan a ni.

1.    Quota hi thlabi zela pek a nih avangin thla tirah pek ṭhin a ni a, quota pek hunah hian harsatna siam phal a ni lo. Hei hi ngai pawimawhin quota pek hun ruatah an khul thei zel tur a ni.

2.    Retailer atana appointment pek an nihna hmunah mipui dawr theihna tur remchangah dawr an hawng ngei tur a ni.

3.    Bûkna hi sorkarin a pawm ngei hman tur.

4.    Dawr hriat theih turin signboard 1x2 hmanga ziak, retailer hming leh veng, phone number, dawr hawn hun leh buhfai rate-te ziak langin an târ ngei tur a ni.

5.    Buhfai pek chhuah reng reng pek zat, pek ni, pawisa pek zat leh eng quota nge tih chhinchhiah nan register fel taka neih a vawn tur a ni a, buhfai latuin register-ah an buhfai lakna zâwnah hming an sign tur a ni.

6.    Englai pawhin fair price shop leh register-te endik theih tura vawn tur.

7.    Quota hi thlabi zela pek a nih angin, pek chhuah a nih aṭanga chhûtin thla khat chhung hawn tur a ni a, pek zawh a nih hma chuan Sunday tiam loin, ni tin zing dar 6:30 - 8:30 leh tlai dar 3:30 - 5:30 chhung an hawng tur a ni.

8.    Allotment hi thla tin list thar tihchhuah a nih avangin, list thar ang zela pek tur a ni a, ration card-ah quota pek a nih rualin retailer-in signature & date pek ngei tur a ni. Ration card-ah pek zat chiang taka ziah lan tur.

9.    Buhfai leh chinite hi sorkarin rate a siam ang ngeiin dik taka pek tur a ni.

10.    Buhfai hralh bâng reng reng mahni thua tihral phal a ni lo a, register-ah chhinchhiaha ziah luh thlap zel tur.

11.    Ration card hi anmahni ta a nih loh chuan retailer-in mi dang ta an buaipui tur a ni lo.