Serchhip MJA-te'n Léng khua an tlawh

India rama tuihna tipung tura hma la ṭha thlan chhuah, North East Zone-a pakhatna Léng khua chu nimin khan MJA, Serchhip district member-te'n an tlawh a; Leng VC hnathawh leh hmalaknate a hmunah an en bakah, khawtlang hruaitute nen an inkâwm.

Serchhip MJA-te hi IPRO K Saitluanga hoin an kal a; YMA Rûna an inkawmnaah K Saitluanga chuan, Mizorama inrêlbàwlna ṭha tak nei Serchhip district-a an awm chu chhuanawm a tih thu a sawi a, Leng khawtlang hruaitute hnenah thilpek a hlàn.

Léng VC president B Vanlalfinga chuan, Serchhip MJA-te chu Leng khuain hmasawnna kawnga hma an lâknate bèl chiang tura tlawh hmasa bertu an nih thu a sawi a; VC inthlan dawna an manifesto-te ṭha taka an thawh ṭhin thu leh VC term hmasaah manifesto an tihhlawhtlin vek thu te, tlawmngai pawl dangte nen ṭha taka an thawhho ṭhin thute leh, tun dinhmun an thlen theih chhan chu khawtlang ṭan rual vang a nih thute a sawi.

Léng khuaah hian chhungkua 184 awmin, mi 900 vel an cheng mek a; tuihna humhalh kawngah nasa taka hma an lak bakah, faina kawngah leh kângmei vèn kawngah nasa takin ṭan an la a, lawmman eng emaw zat an dawng tawh. Kum sarih chhung sikserh (malaria) vei an awm tawh lo a, kum 13 chhungin naupang kum nga hnuai lam thi an nei tawh lo bawk.

Kum 2018-ah Leng khua hi Serchhip district-a ram tikâng lo tura hma la ṭha ber niin, kum 2016 leh 2019-ah pahnihna a ni a; kum 2017-ah Mission Antiodaya hnuaiah Mizorama thingtlang khaw fai ber leh VC inrêlbàwlna ṭha berah thlan a lo ni tawh. Tuihna tipung tura hma la ṭha India ram puma thlanna National Water Award 2019 chu November 11-12, 2020 khan an dawng a; India hmarchhak state-ah Best Village Panchayat a ni tawh bawk a ni.