Two wheeler taxi permit a ṭul angin Sorkarin ngaihtuah belh zel a tum

Transport minister TJ Lalnuntluanga chuan, two wheeler taxi permit pek chhuah belh leh belh loh chungchang chu sorkarin a ṭul angin a ngaihtuah zel tur thu a sawi a; district khawpui dangah sorkarin two wheeler taxi service a phal tawh thu a sawi bawk.

Nimin Assembly session-ah ZPM member Dr Vanlalthlana zawhna chhangin Transport Minister chuan, "Ṭhalai eizawnna la nei lo tam tak an awm a, eizawnna atan two wheeler taxi-a innghat tam takin an la hmu lo. Aizawlah a tlâkdéng leh chhuah lamah pawh bus leh taxi service lohna a tam," a ti.

TJ Lalnuntluanga chuan, two wheeler taxi permit chu a ṭul angin ngaihtuah chhunzawm zel tum a nih thu sawiin, "Mipui mamawh dan thlir chungin hmalak zel tum a ni," a ti a; State Transport Authority chuan district headquarter-ahte two wheeler taxi service a phal tawh thu a sawi a ni.

ZPM member VL Zaithanzama zawhna chhangin Transport Minister chuan, Motor Vehicle Act, 1998 Section 40 hnuaiah Mizoram mi leh sa ni lote'n Mizoramah lirthei an register theih thu House a hrilh.

State páwn leh ram páwna MST bus tlan (service)-tir chungchanga zawhna chhángin TJ Lalnuntluanga chuan, "Manipur sorkarah Aizawl-Manipur (Churachandpur) bus service dilna siam a ni tawh a, Manipur sorkar chuan reciprocal agreement thehlut tura min tih angin a draft thehluh a ni tawh. Tripura sorkarah pawh dilna thehluh a ni tawh a, an lehkha ngaihchan mek a ni," a ti.

Transport Minister sawi danin, Myanmar-a bus service tir chungchangah chuan Ministry of External Affairs-ah lehkha thehluh a ni tawh a; ram leh ram inkar thil a nih avangin Ministry of External Affairs hmalakna ngaihchan mek a ni.