Bru hruai kîr hna thawk turin Mizoram sorkarin hma a la lo
Ministry of Home Affairs (MHA) chuan Tripura relief camp-a Bru awmte zinga Mizoram khua leh tui dik takte Mizorama hruaik kîr hun atan March 31, 2019 thleng hun a pawtsei a; mahse, Mizoram sorkar chuan hmalakna a nei lo.
Home department hotute hnen aṭanga Vanglaini thu dawn danin, ṭum eng emaw zat Bru hruai kîr hna thawh a nih hnuah hruai kîr hna chawlhsan a ni a, chumi hnuah tun hnai khan MHA chuan March 31, 2019 thleng Bru lak lêt hna thawhna turin hun a pawtsei a ni. Hun pawtsei mah se, MHA chuan Bru hruai kir hna thawhna atan ruahmanna a siam lo thung.
Bru lak lêt hna thawh a nih dawn leh dawn loh chu Mizoram sorkar thu a ni a, tun dinhmunah chuan Mizoram sorkarin hruai kir hna thawk turin ruahmanna siam a la nei lo.Hetih lai hian, Home department chuan Bru lak let hna thawh hnuhnung bera Mizorama rawn kîr Bru-te dinhmun an thlirlet a; Bru rawn kîrte chuan an chanvo turte an dawn ṭhat thu tarlan a ni.
MHA, Mizoram sorkar, Tripura sorkar leh Mizoram Bru Displaced People Forum ten Bru hruai kîrna tura July 2, 2018-a New Delhi-a inremna, draft agreement an ziah hnuah, Tripura relief camp-a awm Mizoram Bru-te chu September 2018 ral hmain Mizoramah lak let vek tur an ni a, August 1, 2018 aṭang chuan anmahni chhawmdawlna pek ṭhinte tihtawp vek leh an awmna camp-te pawh ṭhiah vek tura tih a ni.
Draft agreement ang chuan Mizorama let duhte enfiah niin, Bru chhungkua 423-a mi 2,753-te chuan Mizorama an let duh thu, sorkar official-te an hrilh a; August 25, 2018 aṭangin hruai kîr hna ṭan a ni. Mizorama let duha insawi chhungkua 423 awm mah se, hruai kîr ṭan ni-ah hian chhungkaw pakhat chiah Mizorama lêt duh an awm a ni. Chutih laiin, Bru camp hrang hrangah Mizoram ki chhungkaw 5,407 an awma chhinchhiah a ni thung.
Mizoram sorkarin Bru-te hruai kîr a tumnaah hian chhungkaw pathum chiah Mizorama let duh awm mah se, a hnuah chhungkaw 17 (mi 67, puitling 47 leh naupang 20)-te chu Mizoramah hruai kir leh an ni a, chu'ngte chu September 23, 2018 zanah Tlabung, Lunglei district thlenpui niin, Tlabung Zodin V/C huam chhunga an awm lailâwkna tur hmunah dah an ni.
Draft agreement-ah hian, Tripura-a Bru camp-te chu October 2018 aṭangin tihtawpa ṭhiah tur tih ni mah se, tun thlengin ṭhiah a la ni lo a; a thlawna ration pek pawh October 1, 2018 aṭangin tihtawp ni mah se, rei vak lo hnuah sorkar laipuiin a pek chhunzawm leh nghal nia thu dawn a ni.
July 2, 2018-a New Delhi-a Union Home minister Rajnath Singh hoa draft agreement siam ang chuan, Mizorama kîr Bru-te hnena ṭanpuina leh chhawmdawlna sum chhungkaw pakhat tana pek tura ruahman zawng zawng belhkhawm chu Rs. 6,70,000 a tling.
Draft Agreement-a a inziah dan chuan, Mizorama let Bru chhungkaw tin hnenah Rs. 4,00,000 pek tur a ni a, chu chu bank-ah dah tur niin, kum thum hnua lak chhuah theih tura a ni. Cash assistance kum hnih chhung thla tin Rs. 5,000 (kum hnih chhungin Rs. 1,20,000), in sakna tur (house building assistance) Rs. 1,50,000, kum hnih chhung a thlawnin ration pek leh Tripura aṭanga Mizorama an lêtna senso (transportation) Mizoram sorkarin a tumsakte a tel. Mizoramah an lo tur ram pek te, in sakna tur ram ft. 40X30-a zau pekte a tel bawk.