MIMER tihchangtlun dan tur sawiho

MIMER Governing Council chu nimin khan chief minister Zoram­thanga hoin Chief Mi­nister's Office (CMO) conference hall-ah an ṭhu a; MIMER kal zelna tura thawktu leh hma­sawnna ruhrel hrang hrang mamawh siam adan tur leh Medical Council of India (MCI) endikna hmachhawn dan tur an sawiho. 

CM chuan, Aizawl leh a chheh­vela chêngte tan mai ni lo, Mizoram pum tan medical college chu hmun pawimawh a nih avangin, college changtlung tak a nih zel theih nan Governing Council member-te chu uluk taka ngaihtuahna sêng turin a sáwm.

MIMER-ah tunah hian MBBS zirlai batch hmasa berte'n tluang taka class an nei mek zel a, semester exam-te pawh neih a ni tawh. Kumin August thlaah admission thar buaipui tur niin, second year pawh hawn tur a ni. Sesond year atan chuan MCI chuan an tih dan phung angin MIMER hi an endik leh dawn a; teaching faculty leh thawktu dang hrang hrang awm zat bitukte leh ṭul dang hrang hrangte second year zirlaite leh zirlai tharte mamawh tur ang peih a ni em tih an endik dawn a ni. 

Tun dinhmunah MIMER-ah hian zirlai 99 an awm a, seat 100 awm­in, Mizo zirlai 77 an awm a; state quota 70, non resident Indian (NRI) quota seat 14 leh all India quota seat 15 a awm a ni.