MFA-in Sports Minister lawmpui
Mizoram Football Association chuan Sports minister Robert Romawia Royte chu nimin tlai khan a office-ah lawmpuina an hlan.
MFA senior vice president PC Vanlalhruaia chuan, Mizoramin Sports minister ṭha tak a nei leh football tana mi ṭhahnemngai tak a ni chu MFA-in a thlamuanpui thu a sawi a, sports leh football hmasawnna tura a thawh zelna turah MFA-in duhsakna a hlan thu a sawi.
Lawmpuina inkhawm tawi kaihruaitu MFA honorary secretary Lalnghinglova Hmar chuan football hmasawnna tura MFA-in a thawhna kawngah Sports minister uapna, ṭawiawmna leh fin chhuahna an mamawh thu a sawi a; football lama chhum hmin tawh minister a awm avangin MFA chu a lawm hle a ni, tih a sawi.
MFA hruaitute chuan Sports minister hnenah hian Mizorama football khelmual siam hrang hrangte chu a tam thei ang ber football association kuta dah an duh thu te, chu chuan khelmual humhalh kawngah leh a hman ṭangkaina kawngah a ṭhat ber an rin thute an thlen a ni.
Sports minister chuan, "Tunah chuan football tan chauh ni lo, sports pumpui tana hmasawnna kan ngaihtuah a ngai tawh a, chutihrualin football chu kan la tuipui chho dawn chauh a ni," a ti a, sorkarin sports hmasawnna tura hmachhawp hrang hrang a neihte a sawi lang.
Robert Romawia chuan Mizorama state games nei tura an inbuatsaih dan te, sorkarin ni 365 chhunga sports policy tihpuitlin hman ngei a tum thu te, sports mai ni loa youth affairs lama sorkar hmachhawpte a sawi a; MFA chu kawng engkima amah thlawp a, a ṭul huna finchhuah ṭhin turin a sawm.