Mamit district hma-sawnna tur hawn a ni

Union minister for Textile Smriti Zubin Irani chuan nimin khan Udyog Bhavan, Delhi aṭangin video conference hmangin Textile Ministry hnuaia project leh scheme hrang hrang a hawng. Minister-in a hawn zing­ah hian Aspirational Dit-a puan Mamit tihhmasawnna tur 'De­velopment of Eri Sericulture for the Upliftment of Aspirational District, Mamit' a tel.

Smriti Zubin Irani chuan, North East Region Textile Promotion Scheme hnuaia Mamit district tana silk production tihhmasawnna kawnga hmalak a ni chu lawmawm a tih thu sawiin, "Tun aia nasa zawkin silk aṭanga thil siam chhuah a chi hrang tam se, a hralh chhuahna pawh a pun ka beisei," a ti a; pangang khawitute chu hlâwk zawka an thar chhuah theihna turin mithiamte ráwn ṭhin turin a chah.

Development of Eri Sericulture for the Uplift­ment of Aspirational District atan hian NERTPS hnuaiah cheng vbc. 11.56 pawm a ni a, Mamit dis­trict hnuaia Sericulture farmer mi 500-te awmze nei zawka hmalakpui tur a ni. Project a zawh hnuah kum khatah eri silk metric ton 17, cheng nuai 391 man an thar chhuak thei tura beisei a ni.

Project hawn in­khawm hi video confe­rencing hmangin Mamita National Infomatic Centre hmunah bialtu MLA H Lalzirliana, Mamit DC Vanlalngaihsaka, Seri­culture director Lalrozama leh thawktu dangte'n an lo dawngsawng a ni.