CM leh JICA hotute inkâwm
February 18, Thawhṭanni zan khan chief minister Zoramthanga leh Japan International Cooperation Agency (JICA) aṭanga Mizorama JICA project kalpui mek endik tura Tokyo, Japan aṭanga lo kalte an inkâwm.
Chief Minister chuan, kum tam tak aṭang tawha Mizoramin JICA puihna a dawn tawh ṭhin avangin lawmthu a sawi a, "Buha intodelh tura hmalak a ṭul a, hemi chungchang hi min ngaih pawimawhpui a, kan lawm hle a ni," a ti.
JICA senior adviser Dr Nagayo Narihide leh a thawhpuite chuan, Mizoram leh JICA ṭangkawpin RD block palia project an kalpui mekte endik tura lo kal an nih thu an sawi.
Meeting-ah hian, Mizoramin hma a sawn theihna tura mau tihhmasawn (bamboo development) kalpui tur chungchang sawho a ni a; a hlawhtlin theih nan infrastructure ṭha neih a ṭul thu leh, chuta tan chuan ram páwn aṭanga puihna a awm theih dan turte an sawiho.
Kum 2013-14 khan JICA hian agriculture leh horticulture lama Mizorama intodelh theih dan tur zir chhianna an neih hnuah an zir chhianna chu a taka chantir theih a ni em tih enfiahin pilot project an kalpui mek a ni.