Kângmei laka fihlim theihna turin Aizawl Bawrhsapin thupek a chhuah

Aizawl DC chuan thupek chhuahin, kângmei laka mipui an fihlim theihna atan thu zawm turte a tarlang a; thupek zâwm lote chu IPC Section 188 hmanga hrem an nih tur thu a puang. 

Aizawl Bawrhsap chuan, khua a ṭhál a, huan/lo hâl a hun leh ṭan dawn tih tarlangin, "Fimkhur tâwk loh vang leh meikawng sial ṭhat tâwk loh ṭhin avangin, rim taka an thawh chhuahte leh ramte an tikâng nasa ṭhin a, hei hi thil pawi tak a ni," a ti.

.    Lo/huan hâl turte chuan March 15, 2019 hmain an hâl vek tur a ni. An hâl tur thu V/C-te'n DLAO an hriattir hmasa tur a ni bawk.

.    Lo hâl turte'n an hal hmain meikawng ṭha takin an sial vek tur a ni.

.    Ram tihkan loh tur a ni a, VC/LC-te hriattir hmasa loin mahni duh thua hâl loh tur. VC/LC tinin an huam chhung a kan loh nan uluk takin an puangzar tur a ni. 

.    Ramhnuaiah meizial bung paih leh mei chhêm/hâl mai mai loh tur.

.    Kângmei lakah kan him theih nan mahni in leh a velte tifai ṭhain, awlsam taka kâng kai thei thil (petrol, diesel, etc.) lakah fimkhur a ngai.

.    Heng khua - Lengpui, Hmunpui, Sèrzáwl, Nghal­chàwm, Léngte, Sihhmui, Sairang, Sairang Dinthar leh Mualkhang khuate hian Lengpui Airport-a thlawhna veivâk a tihbuai loh nan tlai dar 3:00 hnu lamah chauh lo/huan an hâl tur a ni.