Kolasib district-a CSS hnathawhte thlirho

Kolasib District Development Coordination Committee chu nimin khan DC conference hall-ah an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP-tehoin an ṭhu a; sorkar laipui scheme hnuaia hnathawh hrang hrangte an thlirho.

Meeting-a tarlan danin, Kolasib district-ah hian National Rural Drinking Water Programme hnuaia khaw pariat zinga pali-ah hmalakna zawh tawh a ni a, khaw dang pali-ah hna thawh mek a ni. Swachh Bharat Mission hnuaia ek-in (Individual Household Latrine) 616 sak a ni tawh a, sikul leh anganwadi centyre-te tan inthiarna (latrine) 49 sak a ni tawh.

Pradhan Mantri Ujjwala Yojana hnuaiah a thlawna gas connection pek tawhte chu MIZOFED-in 74%, Auva Gas Agency-in 90%, Ramliana Indane-in 80% a ni. Mizoram State Rural Livelihoods Mission hnuaiah Thingdawl RD Block-ah self help group 357 a awm a, Bilkhawthlir RD Block-ah SHG 267 an awm. SHG ti 

ṭha zualte hnenah a pung awm loa loan pek a ni.

SSA Mission hnuaiah kum 2018-19 chhungin zirlai 8,523 hnenah school uniform grant pek a ni a, kum 2019-20 atan zirlai 7,695 hnenah pek leh tura ruahman a ni.

Kolasib Chief Medical Officer tarlan danin, nausen thi zat tehna, infant mortality rate (IMR) chu 12.6% a ni a, nu nau chunga thi pakhat a awm. Damdawi-ina nau nei zat chu nau nei zawng zawng aṭangin 95.13% an ni a; kum tuhm kal ta aṭang khan Kolasib district-ah sikserh vanga thi an awm lo. Mi 1,910 thisen endik zinga mi 113 chu HIV hrik pai an ni tih hmuhchhuah an ni a; nu nau pai thisen endik mi 1,093 zinga 12 chuan HIV an vei tih hmuh chhuah a ni bawk.

Meeting-ah hian Kolasib district-a MLA pahnih - Serlui bialtu Lalrinsanga Ralte leh Tuirial bialtu Andrew H Thangliana te pawh an tel a ni.