West-III MLA-in a bial chhung a fang

Aizawl West-III bialtu MLA VL Zaithanzama chuan February 18-19 chhung khan a bial chhunga PWD hnathawh leh hmalak mekte a hmunah tlawhin a enfiah a; PWD hotute leh khawtlang hruaitute chu a bial chhunga hna thawh hrang hrangah chak tak leh ṭha taka thawhpuiah a sáwm.

VL Zaithanzama hian February 18 khan Maubawka PWD hnathawhte a en a, Maubawk khawtlang hruaitute nen hna thawh mekte an thlirho. Nimin zing khan Mission Vengthlanga PWD hmalakna leh hna thawh mekte a enfiah leh a; PWD junior engineer Zosangliana leh Mission Vengthlang khawtlang hruaitute'n an ṭawiawm a ni.

VL Zaithanzama chuan, a bial chhunga veng ṭhenkhat, motor kawng la tlang lohnaah a tlang theihna tura phal taka ram petute chungah lawmthu a sawi a, "Khawtlang hmangaihna avang hian chàn pawh kan inhuam fo tur a ni," a ti a; hmalak zelna turah sorkar pawhin khawtlang mipui tan theihtawp a chhuah ngei a rin thu a sawi bawk.