Duhoma tihhmingchhiat tum a nih dan tarlang

Zoram Peoples' Movement (ZPM) chuan, Facebook group pakhatah 'Carrick Kumar' inti chuan MLA-te car leina tur tihpunnaah, motor leina chu cheng nuai 15 tal ni tura rawtna siamah ZPM Legislature Party (ZLP) leader Lalduhoma chu a puh tih an tarlang. Lalduhoma puhna chu thu dik lo, amah tihhmingchhiat tumna a nih thu an sawi.

ZPM thuchhuah tarlan danin, MLA-te car leina chu Rs. 8,00,000 aṭangin Rs. 10,00,000-ah tihpun turin sorkarin General Purpose Committee (GPC)-ah a pu lut a, GPC chuan an ngaihtuah a ni. GPC member-te chu - Chief Minister, Assemnbly Speaker leh Deputy Speaker, Parliamentary Affairs Minister, Assembly Committee hrang hrang chairman-te leh opposition leader-te an ni.

GPC-ah chuan oppo-sition aṭangin Lalduhoma leh Zodintluanga, INC-te an tel a, a bak zawng chu ruling MLA-te vek an nih thu sawiin ZPM chuan,  "GPC meeting-ah hian sorkarin car leina man tihsan hi agenda-ah dahin an ngaihtuah a, sorkarin tihpun a duh avangin committee a ko a ni. Chuvangin, opposition-te hian dodal pawh ni se, a sâwt chuang lo," an ti.

ZPM thuchhuah chuan, "Meeting-ah hian Pu Lalduhoma'n eng rawtna mah a siam lo a, dâwta amah puhchhiat tumna mai a ni," a ti a; a puhtu Carrick Kumar inti pawh biakpawh theih a ni lo a, fake account hmanga dawizep taka intihhmingchhiat tumna a nih thu a tarlang.

ZPM chuan, MLA-te chuan fraternity (inunauna) an nei tih sawiin "An fraternity hi zahawm taka vawnhim chu an tih tur a ni. GPC-a rorelte reng reng hi páwn lama inpuh nan emaw, politics-a inbeih nan emawa hman chi a ni lo," an ti bawk.