Heroin neitu kum 7 táng dawn

Heroin gram 212.6 neitu Lalpekhlui (23) d/o Thanliana, Myanmar, tuna Champhai Kanan Venga khawsa mek chu Champhai District Special Court-a judge R Vanlalena chuan kum sarih chhung jail-a táng tur leh Rs. 80,000 cháwi turin a hrem.

Court order-a a lan danin, June 23, 2017 khan Champhaia Excise & Narcotics duty-te chuan Zokhawthar kawng, Mualkawi bulah lirthei kal vel leh khualzinte an enfiahnaah Zokhawthar lam mexi-cab-a chuang Lalpekhlui hnen aṭangin heroin gram 212.6 an man a ni. 

Lalpekhlui chuan Court hmaah, heroin awmna bag chu pitar pakhatin Champhai thleng kensak tura a ngen thu sawiin, "Eng nge a nih pawh ka hre lo," a ti a; mahse, finfiahna leh thuhretu thusawi aṭangin Court chuan heroin chu Lalpekhlui ta ngei a ni tiin, thiam loh a chantir a ni.