School Education Department hnuaia hna lâk Zirtirtu laknaah written exam a awm dawn lo Grade-IV laknaah wrriten exam a awm dawn

Mizoram sorkarin primary school leh middle school zirtirtu 881 a lak turah tunlai hian application form an pe chhuak mek. Zirtirtu lak turah hian MTET paltlang ngei a ngaih loh laiin, B.Ed emaw, Diploma in Elementary Education (D.El.Ed.) emaw zo tawh nih a ngai thung a; written exam awm loin, personal interview hmanga lak tur a ni. Hetih lai hian, School Education department hian Grade-IV tur eng emaw zat an la dawn bawk a, chutah chuan written exam a awm dawn thung.

Mizoram sorkar hotute chuan P/S leh M/S zirtirtu lak tur zat hi 946 a nih thu an sawi tawh ṭhin a; mahse, tun hnaia MPSC kaltlangin zirtirtu eng emaw zat lak a nih avangin 881 lak a ni zawk dawn. Zirtirtu lak turte hi group B non-gazetted post tur a nih thu School Education department hotute chuan an sawi.

Sorkar laipui thu ang leh Right of Children to Free and Compulsory Education Act duh dan angin, sorkar hnuaia elementary stage-a zirtirtu ni tur chuan kum 2011 aṭang khan Teacher Eligibility Test (TET) paltlang ngei a ngai a; TET hi Mizoram pawhin a hranpa neiin, Mizoram TET (MTET) tih a ni.

School Education hotute sawi danin, Mizoram sorkar chuan tuna zirtirtu 881 lak turah erawh chuan MTET paltlang lote tan pawh dil theih tura tih a ni a, D.El.Ed emaw, B.Ed. emaw neih a ngai thung. Form thehlut zingah D.El.Ed / B.Ed. nei lo an awm chuan hnâwl nghal tur an ni.

D.El.Ed emaw, B.Ed. zir tawh, certificate/marksheet la nei lo tan pawh dil theih a nih thu an sawi rualin, interview hunah marksheet/certificate an neih ngei a ngai. Education dept. hotute chuan zirtirtu atana lak tharte chuan tunah MTET neih ngei ngai lo mah se, kum nga chhungin MTET an paltlang ngei a ngaih dawn thu leh, MTET an paltlang loh chuan bàn mai tur an nih thu Vanglaini palai an hrilh a, "MR-a thawk tur an ni a, MR Regularization Scheme-in a huam loh turin sorkarin a dah a ni," an ti.

Zirtirtu hi district tinah (district council - MADC leh LADC tel loin) thuneitute'n an district-a mi tur lakna an kalpui dawn a, a latu turin District Selection Committee (DSC) din a ni tawh. DSC-ah hian district bawrhsap chu chairman a ni a, DEO chu secretary a ni. Member dangte chu - district chhunga SDEO zinga senior ber (pakhat) leh DPAR aiawh pakhatte an ni. Siaha leh lawngtlai district-ah chuan zirtirtu lakna hi kalpui a ni dawn lo.

Zirtirtu lak tur zat hi P/S atan 817 leh M/S atan 64 a ni a, a vaiin post 881 a ni. Rualbanlote tan 4% hauh a nih avangin, an tán P/S-ah post 33 leh M/S-ah post pathum zuah a ni a, a vaiin post 36 a ni. Rualbanlote tan bik post hauhsak a nih rual hian, rualbanlo (disabled person)-te chuan qualification ngai zawng zawng an neih ve vek a ngai.

M/S zirtirtu lak turte chu Aizawl district-a sikul 14, Lunglei district-a sikul 11, Champhai district-a sikul 11, Kolasib district-a sikul pakhat, Serchhip district-a sikul pakua leh Mamit district-a sikul pathuma thawk turte an ni. P/S zirtirtu 817 lak turte chu - Aizawl district-a sikul 112, Lunglei district-a sikul 132, Champhai district-a sikul 91, Kolasib district-a sikul 49, Serchhip district-a sikul 42 leh Mamit district-a sikul 68-a thawk turte an ni.

Zirtirtu 881 lak turah hian dilna hun hawn mek niin, July 22, 2019 thleng dilna thehluh theih a ni a; July 29 aṭanga August 1 chhungin personal interview buatsaih a ni dawn. Hetih lai hian, School Education department hian MR employee ni tur thoin Grade-IV post 64 lakna turin dilna hun a hawng mek bawk a; pawl 8 pass chin dil theih niin, dilna mi 6,000 chuang aṭangin a lut tawh. Grade-IV post 64 lak turah hian written exam a awm dawn thung a, August 6, 2019-ah written exam neih a ni ang.

School Education department-a zirtirtu leh grade-IV lak turah hian application form pakhat man Rs. 150 a ni a; application form mante chu department-in kawl zui loin, sorkar sum báwm (government revenue)-ah chhûn luh vek tur a nih thu, department hotute chuan an sawi.