Sailulâk-ah meth cheng nuai 900 hû man

July 17, Nilaini zan dar 8:30 vel khan Sailulak YMA leh Village Defence Party (VDP)-te chuan Myanmar aṭanga lak luh nia hriat ruihhlo, methamphetamine (meth) nuai 900 hû vel an man.

Sailulak YMA hruaitute hnen aṭanga thu dawn danin, hnam dang mi pakhat hmarcha phur tura an khua leh an khaw piah Dawn khua (Lunglei district)-a hmarcha phur ṭhin MD Sajidul Haque (24) s/o Khair Uddin, Karimganj chu an rinhlelh avangin enthlak ṭhin a ni a; July 17 pawh khan amah leh hnam dangte'n an khua an paltlang leh avangin niléngin an châng a, an chàn chhuah loh avangin zanah an chàn chhunzawm a ni.

Sailulak aṭang hian Ṭiau, Myanmar chu km. 18 vel a ni a, Ṭiau leh Sailulak inkarah hian Dawn khua a awm a ni. Ṭiau leh Sailulak inkarah kawng chhia a awm avangin hnam dangte chuan East Lungdara JCB hmang (hire) in, Ṭiau lam panin an kal leh a, JCB hmangin Sailulak chu an thleng leh a ni. YMA leh VDP duty-te chuan JCB chu an endik a, hmarcha ip (sai ip) karah meth an hmu ta a ni.

Meth tawlhnaa inhnamhnawiha puh hnam dang pali - MD Sajidul Haque (24) s/o Khair Uddin, Abdul Sahit (23) s/o Abdul Hussain, Aftar Uddin (25) s/o Abalmaia leh Monir Rodin (23) s/o Moto Uddin, Karimganj, Assam mi vekte chu an man tel a; meth leh a tawlhtu mi palite chu nimin khan Serchhip thlenpui an ni.

Serchhip aṭanga thu dawn danin, heng mi palite hi Karimganj lama awm mi pakhat, Dâwn khuaa nupui nei chuan rawn bia angin an insawi a. An bungrua tlem phur thlaksak turin a ngen a, Sailulak aṭanga an va lakna man pawh a tumsak tur thu a rawn hrilh. A thu sawi bawhzuiin Ṭiauah mi palite hi an va kal a, kawngpui a lo pin avangin anmahni betu hian JCB hmang tur leh a hman man pawh a tum vek tur thu a hrilh tih an sawi.

JCB hmang chuan hmarcha nia an ngaih ip paruk chu an phur a, Sailulakah an luhpui a; Sailulak khawtlang hruaitute'n an lo mansak ta a ni. Sailulak khawtlang hruaitute chuan, an thil man chungchang chu Serchhipa Excise & Narcotics department (END) hotute chu an hriattir nghal a, END enforcement-te chuan Sailulak pan nghalin, nimin khan meth, meth phurtute leh meth phurhna JCB-te chu Serchhip an thlenpui.

Methamphetamine an mante chu báwm 60-ah ṭha taka tuama dah a ni a, báwm pakhatah pack 50 zel awmin, pack pakhatah meth mûm 200 zel a awm a; a vaiin mûm 6,00,000 a ni. Meth mûm khat chu Rs. 150 vela hralh ṭhin a ni a, mum 6,00,000 chu cheng nuai 900 vel hû a ni.