KHAWTHLIR

Chief minister Zoramthang hoin nimin khan Mizorama tuialhthei zawn hna thawktu, Oil and Natural Gas Corporation Ltd. (ONGC) leh Geology & Mineral Resources department leh Power & Electricity department hotute'n Cabinet room-ah ONGC hmalakna an thlirho. ONGC hotute chuan, kum 1971-74 aṭanga photo-geological mapping an tih aṭanga nimin thlenga Mizorama hna an thawh tawh dan an sawi a; tun dinhmunah, kawng mumal awm loh vanga an hnathawhin duhthusama hma a sawn theih loh thu CM an hrilh.

Lunglei Venglai Branch MHIP chuan nimin khan an din champha vawi 40-na an lawm a, bialtu MLA C Lalrinsanga, minister-in a hmanpui. C lalrinsanga chuan, chhungkua leh khawtlang nunah hmeichhiate an pawimawh tih sawiin, "Nute rawngbawlna pawimawh ber chu chhungkua a ni," a ti a; MHIP member-te chu MHIP motto 'Mite ṭanpui' tih vawng nung reng turin a chah.

Siaha District Level Coordination Committee on Tobacco Control chu nimin khan district bawrhsap Bhupesh Chaudhary hoin DC conference room-ah an ṭhu a, kum 2018-19 chhunga an hmalaknate an thlir lêt. Kum kal ta chhungin awareness programme vawi 146 leh training vawi 10 buatsaih a nih thu tarlan a ni a; zûk leh hmuam sim duh inziak lut zawng zawng mi 329 zinga 18.9%-in zûk leh hmuam an sim hlen tawh thu an tarlang.

July 17, Nilaini tlai dar 4:30 vel khan Champhai district-a Dilkawn khaw thlawhhmaa feh mi pali chu thláma an awm laiin ṭêkin a déng a, Laldintluangi w/o Lalramnghinga, Dilkawn chu ká chhawn lohin a thi. Ṭêk tlâk lai hian thlámah Laldintluangi bakah, Lalthanzami, Zodinliani leh Laldinsangi te an awm a, anni pawh hi ṭêk tlak tirhah chuan biak theih lohin an awm a; ngaihtuahawm erawh an ni loa thu dawn a ni.