Mimal leh pawlin centre an kalpui mekte Sorkarin a theih angin a pui dawn - CM

Social Rehabilitation Board chu nimin khan chief minister Zoramthanga hoin CMO conference hall-ah an ṭhukhawm. Chief Minister chuan, mimal leh pawlte'n ruihhlo ngaite enkawlna, de-addiction cum rehabilitation centre an kalpui mekte chu sorkarin a theih ang anga a puih tur thu a sawi.

CM Zoramthanga chuan, zu leh drug-in chhungkaw tam tak a tihbuai mek avangin Social Rehabilitation Board chuan hmabak hmanhmawhthlak leh pawimawh tak a neih thu a a sawi a, "Tun dinhmunah chuan ruih theih thila buaite enkawl dam turin Seṭhàwnah inenkawlna hmunpui siam chu ke kan pênna hmasa ber ni se," tiin a rawt.

Seṭhawna centre an din turah tlawmngai pawl, kohhran leh sorkar department hrang hrangte lungrual taka an thawhho a pawimawh tur thu sawiin Zoramthanga chuan, "Hemi rual hian mimal leh pawl anga de-addiction cum rehabilitation centre kalpui mekte chu an hmalaknaah theih ang angin sorkarin a pui dawn a ni," a ti.

Social Rehabilitation Board chairman Dr K Beichhua, Social Welfare minister chuan, zu leh ruihhlo vanga harsatna tâwkte enkawl tura hmalakna hrang hrang kalpui mekte a sawi a, "De-addiction centre hrang hrangte'n inang khat veka an zawm tur inkaih­hruaina - Standard Operating Procedure (SOP) siam a ni," a ti a; de-addiction centre-te accreditation pek an nih theih nan inkaihhruai­na siam mek a nih thu a sawi.

Board vice chairman K Lian­tlinga chuan, YMA-te'n ruihhlo do nasa taka an lo beih tawhnaah lawm­thu sawiin, "Pawl pakhat emaw, department pakhat emaw chauh thawh zawh theih thil a nih loh avangin, beihpui thlak tura Board din a ni hi a lawmawm hle," a ti.

Meeting-ah hian, ruihhlo ngaite tunlai thiamna hmanga an taksa enkawl dam mai bakah, counselling pek an nih a, an chhuahsan hnu pawha an intun nun theihna tur thiamthil zirtir rel a ni. Seṭhawn hi Chief Minister hoin chawlhkar lehah Board member-te'n an enfiah dawn.

Social Rehabilitation Board-ah hian Social Welfare department hnuaia directorate pahnih te, sorkar department paruk - Health & Family Welfare, Sports & Youth Services, Higher & Technical, School Education, Police leh Excise & Narcotics te, Central YMA leh Mizoram Kohhran Hruaitute Committee aiawhte an tel a ni.