Education Policy duan thar sawiho

Sorkar laipuiin India rama zirna kalpui dan tura a duan, Draft National Education Policy (NEP) 2019 chung­changa inrâwnkhawmna leh sawihona chu nimin khan District Institute of Education and Training (DIET), Lawngtlaiah buatsaih a ni.

Lawngtlaia inràwn­khawmnaah hian DEO, RMSA, SSA, LADC Education Department, Lai Students' Association, Central Young Lai Association, Primary School Teachers' Association leh Middle English School Teachers' Association leh private school aiawhte an tel.

NEP 2019 hian anganwadi aṭanga university thleng a huam dawn a; a tum ber pakhat chu - kum 2025 hmaa India rama zirnain rahbi thar a kai theihna tur te, zirlaite'n ziak leh chhiar leh mathematics an thiam vek theihna tura hmalakte a ni.

Policy kalpui dan tur chu, district tinah mahni district dinhmun ngaihtuah chunga zirho a, paih ngai emaw, belh ngai emaw a awm chuan SCERT, Aizawlah rawtna thehluh tur a ni. Rawtna a awm chuan Mizoram SCERT-in Central Committee for Draft National Education Policy-ah a thlen chhawng ve leh ang.