Mizo hmeichhe naupang 2 rûkbo Rél aṭangin chhan chhuah an ni

Railway Protection Force (RPF) sipai, NF Railways hnuaia Katihar Division, Bihar-a awmte chuan July 14, 2019 khan Kamakhya-Indore Express rél (no. 19306) aṭangin Mizo hmeichhe naupang pahnih an chhan chhuak a, a rubotute pawh an man thu an tarlang.

RPF chief public relations officer Pranav Jyoti Sharma-a'n July 17, 2019-a press release a tihchhuaha a tarlan danin, human trafficker-te'n Mizo hmeichhe naupang an rûkbo thu Mizoram Police aṭangin RPF, Maligaon Headquarters-in an dawng a; chu chu Katihar security control room-ah hriattir nghal a ni. Hmeichhe naupangte chu rélah chuanpui an nih thu an dawn avangin Rajdhani Express (no. 12423) leh Kamakhya-Indore Express (no. 19306) chu RPF-te'n an dap a ni.

RPF-te chuan Kamakhya-Indore Express rêl chhungah Mizo naupangte leh a hruaibotua puh Rabina Begaum (Lalmuanpuii), kum 24, Vairengte Kawngthar Veng nia insawi chu an hmu chhuak ta a ni. RPF chuan, hmeichhe naupang leh a hruaibotute chu Mizoram police kutah an hlan tih an tarlang bawk.