Mihringa sumdawnnaah fimkhur a ṭul - Mizoram Police

Police Headquarters-a Arya Mess-ah nimin khan DIG (Northern Range) huam chhunga superintendent of police leh battalion commandant-te'n crime review meeting an nei a, IGP (Law & Order) LH Shanliana leh DIG (Northern Range) Lalbiakthanga Khiangte ten an hmanpui. May 2017 leh June 2018 inkarah aiin, May 2018 leh June 2019 inkarah thubuai ziah luh a tlem zawk tih an tarlang a, mihring hmanga sumdawnnaah fimkhur a ṭul thu an sawi bawk.

Lalbiakthanga Khiangte sawi danin, ram a changkang ang zelin sualna pawh a pung zel a, tun hmaa kan hriat ngai loh mihring hmanga sumdawnna thlengin Mizoramah a awm tawh. Tun hnaiah Mizoram chhungah Myanmar Rakhine state aṭanga raltlan Rohingya mite leh Nepal aṭanga lo kal Gorkhali-te man an ni a; an ṭawngka aṭanga hriat danin, an duhthlanna pawh ni loin, mihringa sumdawnna beitute'n an thlêm chhuah niin a lang.

An retheihna vanga sum hmanga thlêmna leh bumna tâwk an awm ṭhin chu pawi an tih thu tarlangin DIG(NR) chuan, "Kan ram mipui pawh hetiang laka kan him theih nan tun aṭanga fimkhur tura inzirtir leh inkawhhmuh a ṭul a ni," a ti. DIG(NR) chuan, ruihhlo tawlhtute'n Mizoram an paltlang ṭhin tih sawiin, "Law enforcement agency-te chuan theihtawp kan chhuah chungin, kan tirêm tak tak thei lo. Ruihhlo donaa hma latu dang - YMA, VDP leh pawl dangte nena hmalakna ṭha tak siam zel hi kan tihmâkmawh a ni," a ti a; SP-te chu thâ thlah loin an district ṭheuhah tlawmngai pawlte nen hma la zel turin a chah.

Meeting-a tarlan danin, May 2017 leh June 2018 inkar chhungin DIG(NR) huam chhungah thubuai 2,146 ziah luh a ni a, May 2018 leh June 2019 inkarah thubuai 1,813 ziah luh a ni thung a, thubuai 333-in a tlem zawk.

Police-te'n sualna rapthlak zuala an sawi ṭhin - tualthah, ruihhlo (NDPS Act) thubuai leh pawngsual thubuaiah chuan, May 2017 - June 2018 aiin May 2018 - June 2019 chhunga ziah luh a tam zawk a; hmeichhe khawih chingpen leh naupang khawih chingpen erawh kum 2018-19 chhungin a tlem zawk thung.