Jonas Brothers-in Decade Award dawng dawn
Jonas Borthers band chuan an inzawmkhawm leh hnuah chawimawina hlu tak an dawng leh dawn ta.
August thlaa 2019 Teen Choice Awards sem hunah Nick Jonas, Joe Jonas leh Kevin Jonas-te chu Decade Award hlan an ni dawn. Pop group hi kum nga chuang zet an inṭhendarh hnuah kumin February thla khan an inzawmkhawm leh thu an puang a, June thla khan kum sawm hnua an studio album hmasa ber 'Happiness Begins' tih chu an tichhuak a ni.
August 7 aṭangin 'Happines Begins' tour hi an nei ṭan dawn a, nakkum February 22 thleng an nei dawn ang. An tour-ah hian Bebe Rexha leh Jordan McGraw-te chu special guest an ni dawn bawk. Jonas Brothers hi 2019 Teen Choice Awards-ah hian caterogy panga- Choice Music Group, Choice Song: Group, Choice Pop Song, Choice Summer Song leh Choice Summer Group-ahte nominate an ni bawk. Kum 2008 leh 2010 khan award 15 zet an lo dawng tawh.
Decade Award hi Justin Timberlake leh Maroon 5-te hnenah pek a lo ni tawh bawk a ni. 2019 Teen Choice Awards hi August 11 hian Hemosa Beach, California-ah sem a ni ang.