Karnataka: Trust vote lak tur tikhawtlai

Karnataka-a rorellai, Cong­ress-Janata Dal (Secular) MLA 16-ten banna an thehluh avangin nimin khan sorkar fiahna, trust vote nei tura tih a ni. Mahse vote la thei loin nimin tlai khan Speaker Ramesh Kumar chuan vawiin chawhma dar 11 thleng atan rorel inkhawm a titawp.

July 7 khan Congress MLA 13 leh JD(S) MLA pathumin banna an thehluh avangin Congress-JD(S) ṭangrualin member 224 awmna, Assembly House-a MLA a neih zat hi 117 aṭangin 101-ah a tla thla. Hetihlai hian BJP chuan MLA 105 a nei thung a, independent MLA pahnihten ṭangrual sorkar an thlawpna hnukdawkin BJP hi an thlawp bawk.

Assembly Speaker KR Ramesh Kumar chuan MLA helte banna thehluh hi a pawmsak dawn leh dawn lohah thutlukna a la siam lo. Mahse MLA helte hi Supreme Court-a an zualko hnuah court chuan House-a sorkar fiahnaah an duh thu a nih loh chuan tel luih tir an ni tur a ni lo, a ti.

Congress senior leader leh Karnataka chief minister hlui Siddaramaiah chuan Supreme Court-in MLA helte hnena zalenna a pek chungchang chu sawifiah a nih loh chuan, floor test lo neih chu thil awm lo tak niin a sawi a ni. Nimina Assembly in­khawm­ah Karnataka chief minister HD Kumaraswamy chuan House-ah sorkar fiahna tur, trust motion hi a pulut a, debate neih zui a rawt bawk. CM chuan an state-in politics buaina an tawh  mekah Congress-JDS MLA hel leh BJP chu na takin a dem zui a, BJP chu ṭangrual sorkar tihbuai tumah a puh.     

BJP chuan Congress-JDS sorkar chu a inrintawk tawh loh vangin sorkar fiah hun pawh tihkhawtlai tumah an puh. Nimin tlai khan BJP palaite chuan Karnataka Governor Vajubhai Vala hmuin, trust vote neih fel tir turin an ngen. Hemi hnu hian Governor chuan Speaker Kumar hnenah trust vote chu niminah ngei zo fel turin a hrilh nghal a ni. Speaker chuan rorel inkhawm chhunzawm a nih leh hnuah Governor thuchah hi sawichhuak mah se, a thurawn hi zawm duh loin vote la loin inkhawm a titawp a ni.