Entrepreneurship-ah Mizoram a che ṭha

Mizoram chu India ram pumah entrepreneurship lama hmalakna nei ngah ber state/union territory-te zingah a tel. He zir chiannaa a lan danin, India rama entrepreneurship lama hma la ṭha state-te chu puitling ziak leh chhiar thiam (literacy rate) sanna state a ni tlangpui

Union Finance minister Nirmala Sitharaman-i'n January 31, 2020-a Parliament-a Economic Survey 2019-20 a pharh tâka a lan danin, sector hrang hrangte lâk khawmin, Delhi, Mizoram, Uttar Pradesh, Kerala, Andaman & Nicobar Islands leh Haryana-te chu India rama entrepreneurship lama hmalakna nei ṭha leh nei tam state/UT an ni a; heng state/UT-te hi literacy rate 70% chung lam vek an ni. Chutih laiin, literacy rate hniamna state-te chu entrepreneurship lamah an hniam tlangpui tih tarlan a ni.

Services sector lama entrepreneurship activity nei tam zualte chu - Delhi, Mizoram, Kerala, Uttar Pradesh, Andaman & Nicobar leh Haryana-te an ni a; infrastructure sector-ah chuan Jharkhand, Arunachal Pradesh, Himachal Pradesh, Jammu and Kashmir, Mizoram leh Bihar-te a sang zual an ni.

Agriculture sector-a entrepreneurship lama hmalakna nei tam state-te chu - Manipur, Meghalaya, Madhya Pradesh, Assam, Tripura leh Orissa-te an ni a; chutih laiin, Gujarat, Meghalaya, Puducherry, Punjab leh Rajasthan-te chu manufacturing sector (thil siam chhuah lam)-ah entrepreneurship activity nei tam an ni thung.

Hetih lai hian, India chu khawvel pumah firm thar din tam lamah pathumna a ni a, kum 2018 khan ram pumah firm nuai 1.24 din a ni. Firm din thar zat hi kum tin a pung a; kum 2006 aṭanga 2014 chhunga firm-te ṭhanna chu 3.8% a ni a, kum 2014-2018 chhunga a 

ṭhanna chu 80% vel a ni.