Ram chhan kawngzawh huaihawt a ni Theihtawp kan chhuah zel dawn - MZP President

Mizo Zirlai Pawl (MZP) bultumin nimin khan Aizawlah 'Ram chhan kawngzawh' huaihawt a ni. MZP president L Ramdinliana Renthlei chuan, Mizoram humhalh turin theihtawp an chhuah zel dawn thu a sawi.

Kawngzawh hi chhun dar 11 aṭangin Khatla kâwn leh Zarkawt kâwn aṭangin ṭan a ni a, Vanapa Hall kawtah intâwk khawmin, MZP President-in thu a sawi a, resolution an pass bakah Mizoram map an hâl. Kawng zawhnaah hian Aizawla college tina zirlaite an tel a; Mizoram chhunga Assam-in office an siam chu ṭhiah an duh thu te, ram humhalh ngam lo sorkar báng tura an duh thu te, Mizoram humhalh tura an beih zel dawn thute leh thu dangte hmangin an au rual a ni.

MZP President chuan, Vairengte dáia sipai cinema hall hlui Assam Forest department mite'n an luah hnuah Mizoram MLA-te'n an la tlawh loh thu sawiin, "Vairengte dáia ram inchuh vanga buainaah hian vawiin thlengin kan MLA, opposition leh ruling-a mite hian an la tlawh miah lo. Kan MLA rualte hian kan ramri an vei lohzia a lang chiang hle," a ti a; Assam Forest mi leh sate awmna hmun chu a rang lama tlawh tura sorkar thuneitute an phût thu a sawi.

L Ramdinliana Renthlei chuan, an thil phût - sipai cinema hall hlui aṭanga Assam Forest mite chhuahtir chungchanga Home Minister aṭanga chhanna an hmuh chu, 'Assam lam nen sawiho mek a ni' tih a nih thu a sawi a, "Zofate Chawlhbuk sa tura kan ngenna Home Minister aṭanga chhanna kan hmuh chu 'Tun dinhmunah chuan state sorkar ang chuan a rem rih loah kan ngai,' tih a ni. Zirlaite thil phût tihhlawhtling thei lo sorkar kan nei hi a lawmawm loh hle a ni," a ti.

Zirlai pungkhawmte chuan Council of Ministers-in Mizoram ramri chin atana Bengal Eastern Fontier Regulation, 1873 an pawm tâk avangin, Mizoram map hman mek chu a dik tawh loah an ngai a, Vanapa Hall kawtah an hâl a ni.