Mizo ngeiin kawng siam hna an thawh Theihna atan ṭan lâk kan tum - Chief Minister

PWD chuan July 18-19, 2019 chhung khan PWD Engineer-in-chief conference hall-ah an hnathawh thlir lêtna hun an hmang. Nimina an hun hmanpuitu, PWD changtu chief minister Zoramthanga chuan, kawng siam hna Mizo ngeiin an thawh theihna atan ṭan lak an tum thu a sawi.

Chief Minister chuan, kawng siam hna hnam dangin an thawh ṭhin avangin harsatna tam tak a awm thu a sawi a, "Mizo ngeiin kawng siam hna an thawh theih nan ṭan lak kan tum. Mizo contractor-te'n khawl an neih ṭhat tâwk loh avang leh an neih tam tâwk loh avangin an thawk thei ṭhin lo. Cheng vbc. 10 vel budget-ah dah a, hei hi Mizo contractor-te'n hmanraw leina atana loan an lâka interest rulhsak emaw, rulh ṭhensakte rilruah a awm," a ti. Hemi chungchangah hian uluk taka ngaihtuahna lo séng turin PWD hotute a chah.

Budget pass tâk chu a enpui hman loh thu sawiin Zoramthanga chuan, "Inthlan buaia kan buai avangin tun ṭum budget kha ka enpui hman lo tak tak a, a lehpekah chuan ka enpui hman turah ka ngai. Department-te mamawh kan la hriat sèn loh avangin Finance department hnuaiah untied fund a tam thei ang bera dah turin ka ti a ni. Mamawhna apiangah hman a ni ang," a ti a; a thawk chak apiangin sum chu an hman tam tur thu minister-te pawh a hrilh tih a sawi.

Chief Minister chuan, sorkarna an siam hnuah PWD hnathawhah mipuite an lawm nia sawiin, "Budget pawh kan neih hman hma, sorkar hmasa hman bâng hmangin hna kan thawk a ni. Mahse, hna thawk tak tak turin roadroller a indaih lo a, lei turin kan inbuatsaih a, Election Model Code of Conduct-in min nang zui a, kan lei thei ta lo. Roadroller lei hman ila chuan, kan hnathawh hi tun aiin mipuite'n an fak lehzual ang," a ti.

PWD meeting hi engineer-in-chief K Lalsawmvela'n a kaihruai a; PWD secretary HL Rochungnunga pawhin PWD engineer-te fuihna thu a sawi. July 18, Ningani khan Chief Architect, Chief Engineer (Building), Chief Engineer (Highways) leh EAP hnuaia hnathawh hrang hranghte thlir lêt a ni a; nimin khan Chief Engineer (Roads) hnuaia hnathawhte thlir let ve leh a ni.