Mizoram MP-in HRD Minister a kâwm

Mizoram Lok Sabha MP C Lalrosanga chuan July 18, Ningani khan Parliament House-ah Union Human Resources Development (HRD) minister Dr Ramesh Pokhriyal Nishank a kâwm a, Mizoram mamawh hrang hrang a sawipui.

MNF press release tarlan danin, MP C Lalrosanga hian HRD Minister chu, India ram pum huap exam - NET, NEET leh JEE exam-te Mizoram páwnah, Silchar leh Guwahati-ahte nghah a nih ṭhin avangin Mizo zirlaite'n harsatna nasa tak an tawh ṭhin chungchang a sawipui a; Mizo zirlaite awlsam zawka an exam ve theih dan tur ngaihtuahsak turin a ngen.

Dr Ramesh Pokhriyal Nishank chuan, C Lalrosanga thu thlen chu a hriatthiampui thu leh a ngaih pawimawh thu a lo hrilh a; MZU Southern Campus din chungchangah, hmalak thuai ṭul a tih thu a sawi.