KHAWTHLIR

Mizoram police-a CID Special Branch chuan nimin zing khan Saron Vengah Maruti car aṭangin heroin (no. 4) gram 352.9 leh a neitua puh Lalnipuii (27) w/o Lalhmachhuana, Zemabawk leh Lalchhanhima (27) s/o Thanmawia, Zuangtui nia inchhálte an man. Heroin hi tualchhunga an hralhna ang chuan Rs. 11,25,000 man a ni. July 18 zing dar 7 khan SRS duty-te'n heroin hawng 15 leh a neitua puh Thangliana (40), Republic Venghlun an man bawk a, Excise & Narcotics department hnenah an pe. Ruihhlo an man hi Rs. 5,25,000 man a ni.

Chhungkaw 13-te an chenna in aṭanga an inthiar chhuah phahna, Lunglei College Venga primary school bula lei khi chu nimin khan a min belh leh a, a thlanga Saizikpuii te in pawh a him tawh lo a, a chim mai a hlauhthawnawm tawh niin an sawi.

C Lalfakzuala (53), Govt. Complex, Aizawl, July 11, 2019 tlai lama Nghalchawm kài Tlawng luia tla chu Nghalchâwm tlangvalte'n nimin thleng khan an la zawn chhunzawm. Tarlan tawh angin, Central YMA ruahman anga khawtlangin C Lalfakzuala an zawnna chu ni sarih a tlin tawh avangin July 17, Nilaini tlai khan tihtawp a ni. Khawtlang anga zawnna tihtawp ni tawh mah se, Nghalchawm tlangval tuithiam rual mi 30 vel chuan nimin thleng khan an la zawng zel a ni.

Economics & Statistics department buatsaih, Kolasib District Statistical Handbook 2018 chu nimin khan Kolasib DC Zoengsanga'n a pisaah a tlangzarh. Kolasib DC chuan, district chanchin chi hrang hrang hlawm khawmna bu buatsaih a ni chu district tana hmasawnna chi khat a nih thu a sawi. Statistical Handbook-ah hian Kolasib district chhunga mipuite hriat tura pawimawh thil chi hrang hrang dah a ni.

Rural Development minister Lalruatkima chuan nimin khan Zawlnuam RD block office a tlawh a; department hmalaknaah hmasawn zawka kal theih dan tur ngaihtuah zel a nih thu a sawi.