Mizorama la awm ngai lo mau chi hnih Tissue culture hmanga kûi mek a ni

Mizoram Journalist Asso­ciation (MJA), Kolasib district memberte chuan nimin khan Thingdawl rama Horticulture Centre of Excelence an tlawh a, Horticulture department hotute'n an hmalakna hrang hrang an enpui. He hunah hian, Mizorama la awm ngai lo mau (rua) variety pahnih chu tissue culture hmanga kûi mek a nih thu sawi a ni.

Kolasib MJA member-te hi Kolasib-a Horticulture officer C Lalremsiama leh thawktu dangte'n an lo dawngsawng a; Centre of Excellence-a dragon fruit, Mizoram hmun danga la awm ngai lo (Thailand aṭanga lak luh) pangpar chi thar curcuma, fanghma leh hmarchapui an chìn dante leh an hmalakna hrang hrangte enpuiin an hrilhfiah.

Kolasib DHO chuan, tun hma angin thlai hrang hrangah hma la kual dun loin, thlai chi hnih khatah hmalak bik an tum thu a sawi a, "Tun dinhmunah chuan mau chìn lamah nasa zawka kal kan tum a, mau (rua) Mizorama awm ngai lo variety pahnih chu tissue culture hmangin kûi mek a ni a, kum thar lamah chuan chìn theih turin sem hman kan tum," a ti.

C Lalremsiama chuan, Centre of Excelence, Thingdawl chu mahni intum chawpa kal an nih thu leh thawktu mi 10 an awm mek thu a sawi a; kum hmasa khan thlai leh pangpar chi hrang hrang an hralhna aṭangin cheng nuai 53 chuang an lak luh thu leh, cheng nuai 20 vel an hman ral thu a sawi bawk.

Kolasib DHO sawi danin, Centre of Exellence, Thingdawl hi Mizoram páwn aṭang pawhin zirlaite'n inzir nan an hmang tawh ṭhin a; Institute of Horticulture, Noida nen phei chuan inremna siamin, an zirlaite training nei turin an rawn tír lut ṭhin.

Kolasib MJA president R Lalhmingthanga chuan, Horticulture department-in an hmalakna chi hrang hrang chanchinbumite hmaa an pho chhuah avangin lawmawm an tih thu a sawi. Centre of Excelence for Horticulture, Thingdawl hi kum 2013-ah peih a ni a, ram hectare 21.85-a zau a awh. A hung chhungah quarters, greenhouse, water tank/pond, waste land leh ram humhalh bikte a awm. Greenhouse chhungah pangpar chi hrang hrang - rose, curcuma, leh anthurium te, thlai/thei lamah - tomato, capsicum (hmarchapui) leh dragon fruit-te an ching. Zîkhlûm, tomato, serthlum, dragon fruit, avocado, theihai, tengtere thlum chite leh Mizote la hmelhriat vak loh thlai leh thei chi hrang hrang ṭiak an kûi mek bawk.