Buh leh bâla intodelh ngai pawimawh turin MLA hluite'n CM Zoramthanga an ngen
Former Legislators' Association of Mizoram (FLAM) hruaitute chuan July 17, 2019 khan chief minister Zoramthanga an kâwm a; mipuite mamawh ber, a tel loa ni khat pawh an awm theih lohna, buh leh bâla intodelh chu ngaih pawimawh ber (top priority)-ah nei tura an ngen bakah, MLA-te hlawh tipung turin an ngen.
FLAM hruaitute chuan, ei leh bàra intodelh chungchang chu sawi satliah mai lo a, kum 20 chhunga buh leh bâla intodelh turin 'Road Map' siam a, a ṭul chuan International Monetary Fund (IMF) te, World Bank leh Asian Development Bank aṭangtea sum pûk mai turin Chief Minister an ngen a ni.
CM Zoramthanga chuan, ei leh bàra intodelh chungchang chu an ngai pawimawh tih sawiin, "Hei hi SEDP-ah priority-ah kan dah a, kan sawiho ṭan mek a ni," a ti. Mizoram MLA-te dinhmun chungchangah FLAM hruaitute chuan, Mizoramah khawsak a harsa bik a, sum senso a tam bik avangin Assam hnuaia Mizoram a awm lai chuan sorkar hnathawk, Mizorama awmte chu Ration Compensatory Allowances (RCA) pek an ni a, chu chu an hlawh aṭanga chhûtin 33.3% pek an ni ṭhin tih an sawi.
Mizote chu mikhual thleng ṭhin an ni tih sawiin, MLA-te pawh an bial mipui leh an party hruaitute'n an thlen chilh ṭhin tih an sawi a, "Doctor inentirna man, damdawi man te, football jersey, boot, mawza, pocket money thlengin MLA-in a tumsak a ṭul ṭhin. Bial chhunga damlo, Aizawla thi an awmin MLA-in ruang a phurhsak a ngai bawk. Hnam dangin an tawn ve loh, kohhrana thawhlawm thla tin thawh a ṭul a, NGO-te hnenah khawn tesêp dang pek reng a ngai bawk. Vawiina MLA-te'n thla tin Rs. 40,000 an lak hi chuan mikhual thlen man a daih chang chang a ni," an ti.
FLAM hruaitute chuan, Mizoramah primary school headteacher te, LDC senior-te'n thla tin Rs. 1,00,000 an lak laia kan MLA-te'n Rs. 40,000 chauh an la hi chu a âwm tawh lo a ni," an ti a; Chief Minister chu MLA-te hlawh tihpun dan ngaihtuah turin an ngen a ni. Chief Minister kawmnaah hian FLAM hruaitute chu an president KL Rochama hoin an kal a; CM's Relief Fund-ah Rs. 20,000 an chhûng lut nghal a ni.