Zo fate tan harsatna siam an awm chuan Mizoram mit nautê an khawih a ni - Lalruatkima

Minister of state Lalruatkima chuan July 18, Ningani khan Behliangchhip khuaa Tripura-a khaw fai ber lawmman lawmna a hmanpui a; thu sawiin, Mizoram páwna Zo fate tan harsatna siam an awm chuan, Mizoram sorkar mit naute an khawihah an ngai dawn tih a sawi.

Lalruatkima chuan, Mizoram páwna awm Mizote chu hun harsa an tâwk a nih chuan, Mizoramah sorkar chak tak an nei a ni tih hre reng turin a chah a, "Mizoram páwna Zo fate tan harsatna siam an awm a nih chuan, Mizoram sorkar mit nautê an rawn khawihah kan ngai dawn a ni," a ti.

Mizote chu an duh thu rêng ni loin state boundary leh international boundary hrang hrangin a ṭhendarhin an awm tih sawiin Lalruatkima chuan, "Zo hnahthlakte ṭhendarh kan nih dawn hian min ráwn lo a, kan ngaihdan an la lo. Engtik ní-ah emaw chuan Zo fate hi rorelna pakhat hnuaiah kan la awm leh ngei ang tih hi ka rin dan leh kan duhthusam a ni," a ti a; Pathianin Mizote luah chin ram fel takin a thliarsak a, Mizote Kristian an ni vek maite chu a mak a, Pathian siam bik an nihzia a lang chiang hle tih a sawi.

Minister chuan, Mizoramin zalenna a sual laiin Zampui tlanga Mizote'n tha thawh tam tak an neih thu te, Zo fate inunauna sawh ngheh a nih zel theih nan Mizoram sorkarin hma a lak mek thute sawiin, "Tahan, Lamka/Churachandpur leh Zampui tlangah bus service tir turin Mizoram sorkarin hma a la mek a ni," a ti. Tripura-a khaw fai ber nihna Mizo khaw pahnihin an hauh thei chu lawmawm a tih thu a sawi bawk.

Tripura state chhunga khaw fai intihsiaknaah Mizo khaw pahnih - Behliangchhip leh Vanghmun khuate chuan khaw fai ber lawmman an dawng a; an lawmman dawn chu July 18 khan Behliangchhip YMA Hall-ah an lawm a ni.