Mizoramah Coronavirus a lên lohna atan theihtawp kan chhuah - Health Minister

Health & Family Welfare minister Dr R Lalthangliana chuan, tunlaia khawvel ram tam taka hri léng mek Coronavirus chu Mizoramah a lên lohna turin theihtawp an chhuah thu a sawi a, "Task force kan din nghal a ni," a ti.

Dr R Lalthangliana hian nimin khan Mizo Hnam Rûna inkhawmah thu sawiin, Coronavirus chu India sorkar pawhin a ngaih pawimawh thu a sawi a, "Mizoramah pawh meeting koin hmalak nghal vat a ni a, a ṭul anga hma la turin task force din nghal a ni. Mizo pahnih China aṭanga rawn lêt an awm a, damlo angin an lang lo a, kan chîk deuh erawh a ngai," a ti a; Mizo pahnihte chu uluk taka an hriselna dinhmun endik a nih tur thu a sawi.

Mizoram páwn aṭanga lutte chu Lengpui Airport-ah endik an nih thu sawiin Health Minister chuan, "Ram dang aṭanga Mizoram rawn luh theihnaahte pawh checkpost siam a ni. District thuneitute pawh hma la tura hriattir an ni a, hri léng mek dona kawngah sum eng emaw zat a ngaih dawn avangin Finance department nen pawh kan meeting dawn a ni," a ti.

Dr R Lalthangliana chuan, tun hnaia USA-a a zin ṭumin Health & Wellness International office-ah a lèn thu sawiin, "Kan sorkar term tàwp lamah chuan sub-centre-te hi health & wellness centre (HWC)-ah kan hlànkai hman vek kan beisei. HWC chu nurse (B.Sc.)-in an ṭhutchilh dawn a, khaw tênauahte dahin, damdawi pawh an hnianghnâr ang," a ti a; sub-centre 50 vel chu HWC-a hlànkai tura buatsaih mek a nih thu a sawi.

USA-ah World Bank hotute pawh a dawr thu sawiin R Lalthangliana chuan, "Health lama kan hmasawnna turin World Bank-ah cheng vbc. 100 tél hù project kan siam. A khirh khawp a, Mizoram sorkarin phalna min pek bakah, tum ve tur a awm a, chu'ngte chu kan Chief Minister-in hriselna lam a ngaih pawimawh avangin min tihfelsak vek tawh," a ti.

Project chu sor­kar laipuia a endiktute leh India rama World Bank hotute'n an pawm tawh thu sawiin Minis­ter chuan, "World Bank hmunpuiah ngai pawimawh turin ka ngen. Kar kal ta mai khan min rawn bia a, World Bank hotute chuan India rama an rawn kal dawn thu leh inkawm an duh thu an rawn sawi a, February 14 hian Delhi-ah kan meeting ka ring," a ti a; project chu a hlawhtlin ngei an beisei thu a sawi.

Health Minister chuan, a zin hlanin health care-ah buaina deuh a awm thu sawiin, "Ka rawn haw hnuah ka letterhead hmangin private hospital-te health care zawm turin ka ngen a, ka ngen tlaiah an zawm theih thu min rawn hrilh a, ka lawm tak zet. Health care tharah hian damlote'n kum khatah Rs. 2,00,000 an bill thei dawn a ni," a ti.