Revenue expenditure a sang tial tial Department sum bank-a dah a tam
Sorkarin a hnathawkte hlawh, pension hlawh leh inrêlbàwlna (Revenue Expenditure) atana sum a hman ṭhin a pung telh telh a, hmasawnna hna thawhna tur sum (Capital Expenditure) erawh a tlem telh telh thung. Hetih lai hian, department sum lâk chhuah a, bank-a dah eng emaw zat a awm.
Nimin Assembly session-a chief minister Zoramthanga'n a tlangzarh tâk State Finances Audit Report of the Comptroller and Auditor General of India for the year March 31, 2019-a a lan danin, Revenue Expenditure a pung a, Capital Expenditure a tlem telh telh bakah, department sum lak chhuaha bank-a dah leh eng emaw zat a awm.
CAG Report-a tarlan danin, Revenue Expenditure hi kum 2017-18 khan cheng vbc. 6,880.77 niin, kum 2018-19 ah cheng vbc. 7,505.59 a ni a, a punna chu vbc. 624,82 a ni.
Kum 2017-19 aia 2018-19 chhunga Revenue Expenditure a pun tam chhan hlawm liante chu - general education-ah cheng vbc. 137.31, police-ah vbc. 133.48, retirement benefits-ah vbc. 132.59 leh urban development-ah vbc. 105.67-a sum hman a pun vang a ni.
Hetih lai hian hmasawnna hna thawhna Capital Expenditure chu kum 2017-18 aiin kum 2018-19 ah a tlem. Kum 2017-18-a Capital Expenditure chu cheng vbc. 1,996.35 a nih laiin, kum 2018-19 ah chuan vbc. 1,868.47 a ni a, cheng vbc. 127.88-in a tlem zawk.
A tlem chhan hlawm lian chu - power project-ah vbc. 103.25, food storage and warehousing-ah vbc. 46.97, tourism-ah vbc. 60.13 leh crop husbandary-ah vbc. 51.82-a sum hman a tlem zawk vang a ni.
CAG Report chuan, kum 2018-19 khan department 38-a drawing and disbursing officer (DDO)-te'n Treasury aṭangin cheng vbc. 534.20 la chhuakin, bank account 591 hmangin commercial/nationalise bank-ah an dah thu a tarlang a, "Kum 2017-18 khan DDO 60 chuan account 103 hmangin cheng vbc. 368.13 chu bank-ah an dah a, kum 2018-19 ah pawh hei hi an enkawl chhunzawm a ni," a ti.
Consolidated fund aṭanga sum la chhuak a, DDO-ten bank-a an dah chu thil dik lo a nih thu tarlangin CAG Report chuan, "Hei hian sum hman dik lohna kawng a hawng zau a ni. Chu bakah, ruahmanna ang ni loa sum pawhpênna remchang a siam bawk," a ti. Consolidated fund aṭanga sum lâk chhuah hnua bank-a dah chu state sorkarin chhui chiangin, siamṭha se an duh thu an tarlang tel.