Tuirialah college din tum a ni lo

Higher & Technical Education (HTE) minister Dr R Lalthangliana chuan ZPM member Lalchhuanthanga zawhna chhángin, Tuirialah college din tumna a awm loh thu House a hrilh. Chief minister Zoramthanga pawhin kum 2018-a inthlanpui dawnah Tuirialah college din an tum thu a sawi lo niin a sawi.

Lalchhuanthanga chuan, kum 2018 MLA inthlan dawnah Tuirialah college din a nih tur thu a lâr tih sawiin, "Din theih ni se a hmunhma a ṭha a, campus zau tak a awm thei ang. Vote dilna hmanrua em ni? SEDP-ah cheng nuai 3 aia tlem lo in dawng dawn tih nen thuhmun a ni em?" tiin a zawh belh a ni.

HTE Minister chuan, college din belh chu a buaithlakna lai a awm thu sawiin, "Hmun laili lutuka college awmte erawh chu khawpui páwna sawn chhuah dan ngaihtuahna a awm. Vawi leh khata tih erawh a hautak khawp ang," a ti.

Tuiriala college din chungchangah hian bialtu MLA Zoramthanga, chief minister chuan, Tuiriala college din chungchang chu a vawi khat hriatna a nih thu a sawi a, "Tuiriala college din tih kha kei pawh ka vawi khat hriatna a ni.

Campaign laiin vawi khat pawh ka sawi lo, candidate dangin an sawi a nih loh chuan... Kei chuan ka awih lo a, anmahni pawhin sawi eih an nei lo," a ti a; Tuirialah college dinna tur hmun pawh a awm loh thu a sawi.

Lalchhuanthanga chuan, kum 2018-a MLA inthlanpui neih dawnah Tuiriala college din tum chungchanga information chu khawi aṭanga chhuak nge a hriat bik loh thu a sawi rualin, "Mahse, inthlan dawn kha chuan a ri nasa khawp mai," a ti.