MBSS zirlai thih chungchang Health Minister-in a sawifiah

Nimin khan Assembly House-ah Health minister Dr R Lalthangliana'n Zoram Medical College (ZMC)-a MBBS zirlai Nazar Chakma (21) s/o Santi Hriday Chakma, Chawngte thih chungchang a sawifiah.

Health Minister chuan, Nazar Chakma chu February 24, Nilaini chhun dar 12 velah a thih thu sawiin, "Nazar Chakma hi MBBS zir turin July 31, 2019 khan ZMC-ah a lut a ni. An result hmasa ber chu February 23 khan tihchhuah niin, a pass zo lo. A roommate (an hnampui) sawi danin, an result chhuah tuk February 24 zingah tukṭhuan pawh a ei lo a ni," a ti.

Nazar Chakma chu chawhma dar 10 velah badminton khel tura a chhuahsan thu a roommate-in a sawi tih sawiin R Lalthangliana chuan, "Chhun dar 12 vela a roommate a lêt leh chuan chhung lamah kawngka a lo inkalh a, hostel hotute puna kawngkhar tihchhiat a nih chuan Nazar Chakma hi a lo inkhai a ni," a ti a; rang takin damdawi-in panpui ni mah se, an chhan hman loh thu a sawi.

Health Minister chuan, thil thleng chungchang chu Kulikawn Police Station-ah rang taka hrilh nghal a nih thu sawiin, "Police-te'n tih tur ṭul ang ang an ti nghal a, Nazar Chakma chhungte nen pawh an inbe reng a ni. A chhungte'n police leh a roommate thusawi ring tâwkin postmortem loin tlai dar 4 velah an khua panpui a ni a, Falkawn YMA-in a kuang an tumsak. ZMC lamin lirthei ṭul angte an buaipui thung," a ti.