Mizoram kaltlanga kuhva rah phurh Titawp turin sorkarin hmalak a tum

Home leh Taxation changtu minister Lalchamliana chuan,  Myanmar aṭanga Mizoram kaltlanga kuhva rah phurh ṭhin chu tihtawp tum a nih thu nimin Assembly session-ah a sawi.

INC member Zodintluanga Ralte zawhna chhángin Taxation Minister chuan, khawchhak aṭanga Mizoram kaltlanga kuhva rawn lut aṭangin Mizoram sorkarin chhiah a lâk thu a sawi a, "Sorkarin GST a lâk ṭhin hi GST dan hnuaia in register sumdawngte hnen aṭangin lak a ni. Mizoram chhunga hralh a nih chuan GST hi Mizoram sorkarin a chang ang a, Mizoram páwna hralh a nih chuan a hralhna state sorkarin a chang ang," a ti.

Lalchamliana chuan, kuhva chu a ip ang záwngin GST lâk a nih loh thu sawiin, "Tunah hi chuan kg. khat Rs. 40-a hralh angin sumdawngte'n kuhva ro rahah chhiah an pe," a ti a; GST rate chu 5% a nih thu a sawi.

Zodintluanga Ralte chuan, Mizorama kuhva rawn lut chuan khawtlang nun (social life) a khawih thu sawiin, "Kuhva rahah chhiah lâk a nih chuan sorkarin dan phal thilah a ngai tihna a ni em? Assam Rifles nge Mizoram sorkar thu zawk tih hriat loh khawpin police escort pawh an man tih thâwmte a awm. An duh duhna hmunah checkgate an siam a, mipui an tibuai hle," a ti.

Minister Lalchamliana chuan, kuhva hmanga sumdawnnain social life a khawih tih chu a pawm thu sawiin, "Champhai chhehvelah chuan zanah kuhva load a ni ber a, mi pakhatin Rs. 3000-5000 te zan khatah an hlawh thei. Ṭhalai tam takin an zirlai bànsanin, nakin lawkah a la nghawng dawn tih thâwmte hriat tur a awm," a ti a; JCB hmangtein Zokhawtharah chuan truck-ah kuhva hlân a nih thu sawi thâwmte an hriat thu a sawi.

Kuhva rah hmanga sumdawnna chungchanga thu hrang hrang an hriat hmain kuhva rah hmanga sumdawngte'n amah leh sorkar hotu dangte nikumah an biak thu sawiin Lalchamliana chuan, "A awm sa clear an ngen a ni. Hemi tur GST-a in register-te'n Customs leh AR-ah an tlang theihna atan e-way bill siam ang an ti. Hei hi advantage-ah lain tun hnai thlengin Myanmar aṭangin a rawn lut tih kan hria,"  a ti.

Taxation Minister chuan, sorkar laipui aṭang pawhin kuhva rah hmanga sumdawnna chu titawp tura an rawn tih ṭhin thu sawiin, "Kuhva rah ngawr ngawr hi smuggling goods a ni lo a, ram dang aṭanga lâk luh a nih chuan illegal goods a ni," a ti a; Champhai leh a chhehvelah kuhva chìn a nih loh avangin Mizoram kaltlanga kuhva rah hmanga sumdawnna chu a rinhlelhawm thu a sawi.

Home Minister chuan, kuhva rah hmanga sumdawnna titawp turin hma an lâk mek thu sawiin, "Silchar kawngah duty point siamin, khu lama lut thla tur khu chu i dang dawn chhin phawt teh ang tiin hma kan la mek a ni," a ti.

Assam Rifles chungchangah Lalchamliana chuan, "AR-te nen hian kan thuneihna chin a inang lo deuh ang chu. Mizoram sorkar thuneihna hnuaia awm an ni lo a, Ministry of Home Affairs-in direct-a an control an ni. Amaherawhchu, checkpost an siamnate hi free movement regime km. 10 chhungah a ni tur a ni," a ti a; an duh duhna hmuna checkpost an siam ṭhin avangin AR leh state sorkar an intauh ṭhin thu a sawi.