KHAWTHLIR

State NSS Cell ruahmanna angin nimin khan NSS volunteer-te'n Aizawl Civil Hospital blood bank-ah thisen unit 29 an pe a, petute mipa 23 leh hmeichhia paruk an ni. Hrangbana College NSS aṭangin mi 23 leh Aizawl West College NSS aṭangin mi parukin an pe a ni.

Tourism minister Robert Romawia Royte chuan ZPM member Lalchhuanthanga zawhna ziaka chhangin, Aizawl Convention Centre sakna tur sum pek chhuah a la nih loh thu a tarlang a, "Amaherawhchu, Ministry of Tourism Secretary chairman-na hnuaia meeting 20.1.2021-a neih chuan project hi formal approval pein, approval minutes pawh department-in a dawng tawh," a ti.

R Vanlalzauva lehkhabu ziah, 'Lirthei khalhtute pawimawhna' tih chu nimin khan minister of state K Lalrinliana'n a pisaah a tlangzarh.

Khawzawl bawrhsap Zothanmawia chuan nimin khan Housing 

for All hnuaia Khawzawla in sak ṭanpuina dawngte hmalakna a enfiah. Housing for All hnuaia in sak ṭanpuina hi Khawzawl khawpuia chhungkaw 691 hnenah first instalment pek a ni tawh a, second instalment nghah  

mek a ni.

MNF party chuan thuchhuah siamin, February 24, Nilainia Assembly session-ah chief minister Zoramthanga'n Myanmar lama Mizote harsatna tawh mek chungchangah, an thlavâng hauhna thu a sawi chhuak chu lawmawm an tih thu leh an chhuan thu an tarlang a, "Pu Zoramthanga hi Mizote tan pa nih a tling tak zet a, MNF chuan thlamuanthlak a ti 

hle," an ti.

Thangram Indigenous People Movement (TIPM) chuan February 24-25, 2021 chhung khan Assam-a Mualmawi khuaah Thangram Cultural Meet an buatsaih a, Rajya Sabha MP K Vanlalvena khuallian a ni. ZORO general secretary Lalmuanpuia Punte leh ZORO Ṭhalai president L Ramdinliana Renthlei ten an hmanpui bawk.

Hnahthiala mipui phur lirthei (transport vehicle) neitute leh khalhtute pualin nimin khan RD conference hall-ah traffic rules chungchang inzirtirna buatsaih a ni a, Hnahthial SP Lalbiakkila'n a hmanpui. SDPO Vanlalbiaka Joute, PWD junior engineer Rongurliana leh ASI Lalrinzuala Sailo i/c traffic ten kal khawmte chu thil pawimawhte an zirtir a ni.

Excise & Narcotics department (END) leh 46th Assam Rifles-te ṭang dun chuan nimin chawhnu dar 3:22 khan Hnahthial district-a Ngharchhip khaw dáiah heroin gram 762 (hawng 63) leh a neitua puh Boih Nun Chung (26) s/o Lalramthanga, Leisen, Myanmar-a khawsa nia inchhál an man. Boih Nun Chung hi NDPS Act, 1985 tlawhchhanin thubuai siamsak a ni.

Khawrihním VC & All NGO chuan thuchhuah siamin, an khaw pa Hmangaihthanga s/o Rev. Lianpuichhinga, February 18, 2021-a râwng taka thah a ni chu an khaw mipuite'n pawi an ti a, an dem tak zet thu leh, a tu leh fate an tawrhpui thu an tarlang. Tualthattua puh Andrew Vanlalruata s/o Chawnglianngura chu an dem thu sawiin, "A chungah dan anga a na thei ang bera hremna lek ngei turin thuneitute kan phût a ni," an ti a; Andrew Vanlalruata chu Khawrihnímah kîr tawh lo se an duh thu an sawi bawk.