Sorkarin ramri buai a awm palh atan Ruahmanna a siam - FCSCA Minister

Food, Civil Supplies & Consumer Affairs (FCSCA) minister K Lalrinliana chuan, ramri buai vang emaw, eng emaw thulh atan sorkarin ruahmanna a siam thu a sawi.

ZPM member Vanlalhlana zawhna kal zelah FCSCA Minister chuan, Mizoramin tuialhthei dah khawlna a nei mumal lo tih sawiin, "Kan stock neihna chu petrol pump hi a ni mai. Khat vek mah se, ni nga vel tla a ni mai. Ramri buai avanga harsatna kan tawh khan CM, Dy. CM leh HM-te puihna leh ṭanpuinain oil leh gas bik Manipur aṭangin kan phur a, kawng tihfel sa a awm tawh," a ti.

K Lalrinliana chuan, oil leh gas chu Tripura aṭang pawha phur turin ruahmanna siam a nih thu sawiin, "Chief Minister hmalaknain Tripura nena kan inrìna Kanhmuna lei chu oil leh gas phur zo tura tihchak a ni tawh. Bairabi leh Zamuang inkara Teirei lei chak zawng PWD lam kan zawt a, min la chhang lo," a ti a; Teirei lei chuan oil leh gas phur a zo a nih chuan Tripura aṭanga phurh theih tum a nih thu a sawi.

Supply Minister chuan, Mualkhang Bottling Plant tihlen tum a nih thu sawiin, "IOC-te a ram tur kan pek a ngai a, chumi tur chu kan tifel vek tawh. Financial year zawhah sum pek thei tawh kan inbeisei. Oil depot pawh Bairabi-ah siam tum a ni a, CM-in min enpui tawh. Ram kan la tifel lo a, Kolasib DC-in tunah hian a buaipui mek a ni," a ti.

Kudam neih ṭhat a pawimawh thu sawiin K Lalrinliana chuan, "Kudam 10 kan sa zo tawh a, CM-in a hawng tawh. Sak zawh la hawn loh pakhat a awm. NABARD sum hmangin 21 sak leh mek a ni. Kudam a hul ṭhat loh chuan buhfai a chhe hma," a ti a; Zuangtui kudam chhâwk zângkhai nan leh eng emaw thulha inrinna atan national highway ànah kudam lian sak tum a nih thu a sawi bawk.