Secretary-te hna chan sîksawi

Mizoram sorkar chuan February 24, Nilaini khan sorkara secretary-te hna chanpual leh IAS leh MCS officer-te awmna a sîksawi a; Aizawl DC atan Dr Lalhriatzuali Ralte, IAS dah a ni.

DPAR-in February 24-a hriattirna a chhuah danin, additional chief secretary JC Ramthanga, IAS chu PWD, Horticulture, General Administration leh SAD  (additional)-te chang tura tih a ni a; Aizawl bawrhsap atana ruat thar Dr Lalhriatzuali Ralte chu FCSCA director aṭanga dah niin, a kalsan tak FCSCA director turin ICT additional secretary Nazuk Kumar, IAS ruat a ni.

Aizawl DC ni lai R Lalramnghaka, IAS chu Health secretary atan dah a ni a, Lunglei DC V Lalsangliana, IAS chu Commerce & Industries director tura tih a ni. Lunglei DC turin Thenzawl SDO ni lai Kulothungan, IAS ruat a ni a, a kalsan takah Aizawl assistant commissioner Amol Srivastava, IAS a awm ang.

Hnahthial DC Vanlalmawia, MCS chu Higher & Technical Education director a ni dawn a, H Dolianbuaia, MCS chu Hnahthial DC a ni zui ang. C Laltleipuii, MCS chu Serchhip SDO(S) a ni dawn a, C Lalduhzuali, MCS chu Lungleiah BDO leh settlement officer tura tih a ni bawk.