Champhai DC-in Vavu Dil project a hawng

Champhai DC Maria CT Zuali chuan February 24, Nilaini khan Champhai Town Multipurpose Cooperative Societies Limited (CTM-PACS) hmachhawp Vavu Dil Project hnuaia hmalaknate a hawng.

Vavu Dil project hnuaiah hian bamboo vinegar siamna, vawk farm leh tui verhte a tel.

Maria CT Zuali chuan, ram changkang leh ropui zawkahte society intélkhawm chak tak a awm ṭhin tih sawiin, "Champhaia hetiang kan nei hi a vanneihthlak hle. Neitu nihna thinlung pu chunga a hmunhma leh sum awm angte thiam taka hmang ṭangkai a, hma­lakna nasa tak CTM-PACS-in a nei hi a fakawm tak zet a ni," a ti a; district administration anga puih theihnaah puih a inhuam thu a sawi.

He huna tarlan danin, bamboo vinegar siamna khawl bun nan PMVDY aṭangin Rs. 15,00,000 hmuh a ni a, CTM-PACS hnuaia self help group (SHG) member mi 300-te a siam dan zirtir an ni.

Vawk pasarih hmanga vawk farm bul ṭan chhin chu a hlawhtlinga hriat a nih hnuah an sum khawl aṭangin Rs. 10,00,000 hmangin hmalak a ni a; tun dinhmunah vawkpui 10, vawkpa pahnih leh vawk notê 27 an enkawl mek. Vawk vulh aṭang hian Rs. 2,36,395 an la lut tawh.

Tui verh hna chu society sum, Agriculture department leh Van Dhan Yojana ṭanpuina Rs. 2,13,635  hmanga siam a ni a, Agriculture department hnuaiah tui dah khawlna zêm pathum siam zawh a ni tawh a, society-in tui a hralh chhuak mek a ni.

CTM-PACS hi Champhai Chhungte Farming Cooperative Society tih hming púin kum 1994-ah sapthei chíngtu mi eng emaw zat intélkhâwmin an din a, November 2015-ah Champhai Town Multipurpose Cooperative Society Limited tia thlak a ni. Kum 2012-ah Primary Agricultural Credit Cooperative Societies atan thlan a ni a, member 152 awmin, kum tina society sum khawih chêt chu cheng nuai 1000 vel a nih thu an tarlang.