KHAWTHLIR

Johnson College-a National Service Scheme (NSS) chuan nimin khan an college-ah blood donation camp an huaihawt a, Aizawl Civil Hospital tan thisen unit 174 an pe a, a petute mipa 148 leh hmeichhia 26 an ni.

MHIP General Headquarters chu Court-in inthlang thei lo tura a dah hnuah, August 28, 2019 khian Vanapa Hall-ah an inthlang dawn. Inthlan tur chungchangah hian MHIP Coordination Committee chu nimin khan Synod Conference Centre-ah an ṭhu a ni.

July 21, Pathianni zan dar 8:30 vel aṭanga chin hriat loha awm Rochuailova (40) s/o Lalhmachhuana, Tuipui-D khua chu khawtlangin an zawn hnuah nimin khan Vartek kai chhak, Darzo ram lamah thia hmuh a ni. Thu dawn danin, Rochuailova hi lawng hmanga balu la ṭhin a ni a, Ṭiauzau-ah a lawng thlun chu July 21 zan inkhawm bànah enfel turin a mahin a kal a, chin hriat lohin a awm zui a ni.

Kumina Lok Sabha MP inthlana Champhai district-a electronic voting machine (EVM) hmante chu nimin khan chinfel a ni a, a dahna turah dahṭhat nghal a ni. Champhai district-a Assembly contituency panga tana EVM strong room-te chu political party, security personnel leh election official-te awm laiin chawhma dar 11 khan hawn a ni a, VVPAT chhunga paper slip-te la chhuakin enfiah a, seal hnuah dahṭhat vek a ni.

Nimin khan Lunglei Chief Medical Officer pisaah thuthar thehdarhtute leh Health department-a thawktute'n hri danna pek chungchang an sawiho. Meeting-a tarlan danin, tun dinhmunah National Immunization Schedule-ah vaccine pakua pek mek a ni a, vaccine thar Rotavirus vaccine (RVV) pek tur nen vaccine 10 an pe tawh dawn. Vaccine-te hi private-ah chuan Rs. 50,000 chuang man a ni a, sorkarin a thlawn vekin a pe a ni.